+7 (777) 001 44
99
US Open турнирінің жартылай финалына шыққаннан кейін Елена Рыбакина WTA-ның live-рейтингінде Беларусь өкілі Арина Соболенконы басып озып, турнир қалай аяқталса да, жеткізбейтін болды. 14 қыркүйектен бастап Қазақстан тарихында алғаш рет әлемнің бірінші ракеткасы пайда болады.
Елена Рыбакина және Олимпиада ойындары
27 жасқа қараған шағында Елена екі Үлкен дулыға турнирінде, сондай-ақ WTA қорытынды турнирінде жеңіске жетіп, әлемдік рейтинг шыңына көтерілді. Әлемдік теннисте Рыбакина әлі бағындырмаған санаулы белестердің бірі – Олимпиада ойындарының медалі.
2021 жылы Токио Ойындарында қазақстандық спортшы жекелей сында медаль алуға өте жақын болды – ол қола жүлде үшін өткен матчте Элина Свитолинаға жол берді.
2024 жылы Парижде өткен Олимпиадада еліміздің үздік теннисшісі денсаулығына байланысты өнер көрсете алмады.
2028 жылы әлемнің жаңа бірінші ракеткасында тағы бір мүмкіндік болады, бұл ретте Рыбакина аталған Ойындарда жекелей сында ғана емес, миксте (аралас жұп) де бағын сынауы мүмкін.
Былтыр қазақ теннисінің үміті Әмір Омарханов Рыбакинамен бірге жұптасып ойнағысы келетінін айтқан болатын. Ол кезде Елена қарсы емес екенін білдірген.
- Жақын арада бұл қаншалықты мүмкін және өзіңіз Әмірмен бірге ойнауды қалайсыз ба?
- Тамаша болар еді. Оны кейінгі рет Уимблдонда көрдім. Өкінішке қарай, көбірек араласуға, бірге жаттығуға уақыт жетпей жатады. Бірақ жақын болашақта... Балалар қазір ересектер турнирлерінде көбірек ойнай бастайды деп үміттенемін.
Әрине, оларды оңай жол күтіп тұрған жоқ, бірақ мен жігіттердің бірімен ойнауға өте қуанышты болар едім. Бұл көңілді әрі белгілі бір дәрежеде пайдалы болады деп ойлаймын. Бәлкім, олар менен бір нәрсе үйренер. Жалпы, жақын болашақта деп үміттенемін, - деген еді сол кезде әлемнің болашақ бірінші ракеткасы.
Instagram-дағы бұл жарияланымды көру
Биыл Әмір ересектер арасындағы турнирлерге қатыса бастады және өз мақсаттарының бірі ретінде Олимпиада ойындарына, соның ішінде миксте қатысуды атайды.
- Олимпиада ойындарына қарай мұндай дуэттің келешегін қалай бағалайсыз?
- Еленаның деңгейі абсолют топ-дәрежеде екенін түсінемін, сондықтан мұндай матчтің мүмкіндігі қазір менің жауапкершілігімде. Әрине, егер мен белгілі бір деңгейге жетіп, корттың екінші бетінде онымен бірге тұруға лайықты болсам, үлкен ықыласпен ойнаймын, әсіресе осындай ірі жарыстарда ел намысын қорғау мен үшін бақыт болар еді, - деп жауап берді Әмір Tengri Sport-қа берген сұхбатында.
- Келесі жазғы Олимпиадада – 2028 жылы Америкада бұлай болуы мүмкін деп ойлайсыз ба?
- Әбден мүмкін. Мен мұны жоққа шығармаймын. Яғни, бұл тым ерте деп есептемеймін. Ол жаққа баруға мүмкіндігім бар деп санаймын, сондықтан 2028 жылғы Олимпиадада Елена Рыбакинамен миксте ойнау алдыма қойған мақсатым болсын", - деді ол.
Естеріңізге сала кетейік, 2028 жылғы Олимпиада ойындары Лос-Анджелесте өтеді. Елена бұл додаға қатысу мүмкіндігі туралы әлі пікір білдірген жоқ.
Ал Әмірге келетін болсақ, 18 жастағы теннисші ересектер деңгейіндегі алғашқы маусымын өткізіп жатыр. Жасөспірім шағында ол Үлкен дулыға турнирінің жасөспірімдер арасындағы жекелей сынында 1/4 финалға дейін жеткен.
2025 жылы әлемдік жасөспірімдер рейтингінің 4-ші сатысына көтерілді және қазірдің өзінде ATP рейтингінде әлемнің үздік 1000 теннисшісінің қатарына кіреді.
Қазақ теннисінің үміті Әмір Омархановпен толық сұхбатты SauBall YouTube-арнасынан көре аласыз.
“Қазақстан атынан шыққанымды мақтан тұтамын“ - әлемнің бірінші ракеткасы Рыбакина
