Рыбакинамен матчтегі іс-әрекеті үшін Соболенкоға айыппұл салынды

Теннис әлеміндегі инсайдтарымен танымал журналист Майкл Самульски Американың Үлкен дулыға турнирінің қорытындысы бойынша барлық айыппұл көрсетілген кестені жариялады.

Оның мәліметінше, Арина Соболенко III O санатындағы ережені бұзғаны үшін, яғни спорттық құралды (ракетканы) дұрыс пайдаланбағаны үшін 7 500 доллар (3,3 миллион теңге) көлемінде айыппұл төлейді.

Соболенко нақты не үшін жазаланды және қандай жағдайда айыппұлдан құтылып кетті?

Ұйымдастырушылар әлемнің бұрынғы бірінші ракеткасының финалдық матч аяқталғаннан кейінгі әрекетін санкцияға лайық деп тапса керек. Жарияланған кестедегі ереже бұзу күні Елена Рыбакинаға қарсы өткен ойынмен сәйкес келеді.

Орындығына оралған Арина ракеткасын корт төсеміне бірнеше рет бар күшімен ұрған, бұл құрал-жабдықты пайдалану ережелерін анық бұзу саналады.

Айта кетейік, америкалық БАҚ бұл әрекеті үшін Соболенкоға 70 мың доллар (шамамен 31 миллион теңге) көлемінде айыппұл салынуы мүмкін екенін жазған болатын.

Ракетканы сындырудан бөлек, Арина операторға қатысты да дөрекілік танытқан еді. Алайда ұйымдастырушылар бұл жайтқа көз жұма қарауды жөн көрген.

Арина Соболенко Рыбакинаға қарсы матчтерде эмоциясын ұстай алмайды

Әлемнің үздік теннисшілерінің бірі қазақстандық Елена Рыбакинамен өткен ойындарда жиі эмоцияға беріледі.

Еленаның Аринаны алғаш рет жеңген кезінде - 2023 жылдың наурызында Индиан-Уэллстегі (АҚШ) турнирде - марапаттау рәсімі кезінде Соболенко тілін шығарған болатын.

Бұдан да сорақы эпизод 2025 жылғы WTA Қорытынды турнирінің финалында болды. Сол кезде Арина Рыбакинаның кезекті сәтті соққысынан кейін: "Жылына бір рет таяқ та атады!" - деп айқайлаған еді.

Еске сала кетейік, кезекті бетпе-бет финалда Елена Рыбакина Соболенконы 6:4; 5:7; 6:2 есебімен жеңіп, әлемдік рейтингтегі арақашықтықты 2026 ұпайға дейін ұлғайтты.