Рыбакинаның атышулы бапкері сенсациялық матч кезінде кетіп қалды

Әлемнің екінші ракеткасы Елена Рыбакинаның бапкері, хорватиялық маман Стефано Вуков шәкіртінің күтпеген жерден жеңіліс тапқан матчі кезінде кетіп қалды, деп хабарлайды Tengri Sport.

Қазақстанның үздік теннисшісі Елена Рыбакина "Ролан Гаррос" турнирінің екінші айналымынан кейін өткен баспасөз мәслихатында бапкері Стефано Вуковтың ойын кезінде кетіп қалғанын айтты.

Спортшының сөзінше, маман өзін жайсыз сезінген, сондықтан олар мұндай мүмкіндікті алдын ала талқылаған.

"Ол соңғы бірнеше күнде өзін өте нашар сезінгендіктен кетіп қалды. Ол маған: "Мүмкін, мен кетермін. Қалуға тырыстым", - деді. Оның жағдайы мәз емес еді. Бұл біз үшін тосыннан болған жоқ, біз бұл туралы сөйлескенбіз. Оның тарапынан ешқандай ерекше жағдай болған жоқ. Олар тек менің белсендірек ойнауыма, аяғыммен көбірек жұмыс істеуіме ықпал етуге тырысты, өйткені доп өте жылдам ұшады", - деп келтірілген Рыбакинаның сөзі.

Сондай-ақ қазақстандық теннисші матчқа қатысты пікір білдірді. Ол жеңіске жету үшін жеткілікті деңгейде ойнамағанын әрі тым көп қателік жібергенін мәлімдеді.

"Тіпті қарапайым доптардың өзі, жылдам ұшпағандай көрінгенімен, доп тым жоғары секіреді, сондықтан білекке үлкен күш түсіру керек. Қолдың жылдам қимылымен ойнау қажет. Бүгін менің тарапымнан бұл жеткіліксіз болды. Допқа шабуыл жасай алмаған кездердің өзінде оны ойында сақтап қалуға тырыстым. Мен тым көп қателікке бой алдырдым", - деп толықтырды қазақстандық спортшы.

Еске сала кетейік, Ролан Гарростың екінші айналымында Елена Рыбакина украиналық теннисші, әлемнің 55-ракеткасы Юлия Стародубцевамен кездескен болатын.

Қазақстандық спортшының қарсыласы бірінші сетте тек үш гейм алып, 37 минутта есе жіберді.

Екінші сетте Рыбакина күтпеген жерден тек бір гейм алып, екі рет қос қателік жіберді.

Үшінші сет барысында Елена 0:3 есебімен ұтылып жатты, содан кейін ойын тай-брейкке ұласты, онда Стародубцева басым түсті (4:10). Матч 2 сағат 30 минутқа созылды.

Ойын 6:3; 1:6; 6:7 есебімен Елена Рыбакинаның жеңілісімен аяқталды.

Рыбакина мен Вуков: қарым-қатынас тарихы

Еске сала кетейік, 2024 жылдың тамызында Рыбакина Вуковпен ынтымақтастығын тоқтатқанын жариялаған болатын.

Содан бері айырылысу себептері туралы бапкер де, спортшы да ашып айтқан жоқ, алайда маман WTA бапкерлері тізімінен шығарылып, ұйым тергеу жүргізді.

Кейін қазақстандық теннисшінің бапкерді командаға қайтарғаны белгілі болды, бірақ тергеуге байланысты шеттетілуі себепті ол WTA аясындағы турнирлерде ресми түрде оның бапкері бола алмады.

Бұл ретте қазақстандықтың ресми бапкері италиялық Давиде Сангинетти болды. Ол Вуковтың Рыбакинаны дайындау процесіне одан әрі қатысуына қарсы емес екенін атап өткен еді.

2025 жылдың ақпанында Сангинетти мәлімдегендей "Вуков әрқашан жанында болады, ол мен Елена жақын жандар" деп, спортшы мен маманның қарым-қатынасы жаттығу аясынан тыс екендігі туралы көптеген қауесетке негіз болды.

2025 жылдың тамызында WTA Вуковтың ұйым аясындағы турнирлерде жұмыс істеуіне қойылған тыйымды алып тастады.