Сәтпаев “Қайрат“ сапында соңғы матчін қашан өткізетінін айтты

"Қайрат" пен Қазақстан ұлттық құрамасының вингері Дастан Сәтпаев "Челсиге" аттанбас бұрын, алматылық клуб сапындағы соңғы ойындарын 17 және 21 маусымда өткізетінін айтты, деп хабарлайды Tengri Sport блогер Артур Асқарұлына сілтеме жасап.

Дастан Сәтпаевтың сөзінше, оның "Қайрат" сапындағы соңғы кездесулері "Қызылжарға" қарсы ойындар болмақ.

– Маусымның соңында Алматымен қоштасып, Лондонға жол тартатының рас па?

"Үлкен ықтималдықпен солай, әзірге соңғы матчімді 17 немесе 21 маусымға жоспарлап отырмын. 17 маусымда үйдегі матчке 100 пайыз қатысамын", - деді Дастан блогерге берген сұхбатында.

17 маусымда алматылықтар футболдан Қазақстан чемпионатының кейінге қалдырылған 17-туры аясында өз алаңында "Қызылжарды" қабылдайды, ал 21 маусымда 14-тур аясында Петропавлға барады.

Шамасы, осыдан кейін 17 жасар вингер "Челсидің" маусым алдындағы дайындық жиындарына аттанып, жаңа жаттықтырушы Хаби Алонсоның қол астында жұмысын бастайды.

Дастан Сәтпаев "Челсиде": трансфер тарихы

Еске сала кетейік, Дастан Сәтпаевтың "Челсиге" ауысуы 2025 жылдың ақпанында рәсімделген болатын, бұл туралы алматылық "Қайрат" хабарлаған еді. Ол кезде Дастанның кәмелетке толғанға дейін Англияға ауыса алмайтыны туралы шарттар да айтылған болатын.

Бұдан бұрын Сәтпаевтың "Челсимен" келісімшартқа отырғаны туралы инсайдер Фабрицио Романо хабарлаған. Ол бұл трансферді ел тарихындағы рекордты көрсеткіш деп атады, Қазақстан клубтары бұған дейін өз тәрбиеленушісі үшін мұндай қомақты қаражат алып көрген емес.

Дастан "Қайраттың" жастар командасында ойнап жүргенде-ақ "Челси" скауттарының назарына ілігіп, 16 жасында ел чемпионатында негізгі құрам сапында дебют жасаған болатын.

Қазіргі уақытта Сәтпаевтың еншісінде Чемпиондар лигасының іріктеу кезеңі мен жалпы кезеңіндегі голдар, Қазақстан Премьер-лигасындағы 19 гол, екі чемпиондық титул және ұлттық құрама тарихындағы ең жас гол авторы мәртебесі бар.

Бұған дейін Дастан Сәтпаев Қазақстан құрамасы сапына қосылып, Армения мен Мажарстанға қарсы алдағы жолдастық кездесулерге шақырту алған болатын.