Шымкенттегі стадионға 55 мың адам сыя ма? Әкімдік жауабы

Фото: Шымкент ПБ//© Tengrinews.kz / Әлімжан Ақажол/

Әлеуметтік желілерде Шымкенттегі жаңа стадионның сыйымдылығын 35 мыңнан 55 мың адамға дейін арттыру туралы шешім қабылданғаны жайлы ақпарат пайда болды. Tengri Sport мәліметті анықтап, сыйымдылықтың артуы оның қауіпсіздігіне әсер ете ме, жоқ па - соны білді.

Әлеуметтік желілерде Шымкенттегі жаңа арена 55 мың адамға шақталады деген ақпарат тараған кейін біз Шымкент қалалық құрылыс басқармасына хабарластық.

Әкімдік біздің сауалымызға мұндай мүмкіндіктің шынымен қарастырылып жатқанын, бірақ түпкілікті шешім әлі қабылданбағанын түсіндірді.

"Қазіргі уақытта бейінді мамандар мен сараптамалық ұйымдардың қатысуымен стадион сыйымдылығын арттыру мүмкіндігі зерделеніп жатыр. Стадион сыйымдылығын арттыру мәселесі FIFA талаптарына сәйкес ірі спорттық және халықаралық іс-шараларды өткізу, сондай-ақ жобаның техникалық-экономикалық тиімділігін арттыру мақсатында қарастырылып жатыр", - деп жауап берді мекеме.

Бұл ретте әкімдік сыйымдылықтың артуы нысанның қымбаттауына әкеп соқпауы тиіс екенін атап өтті.

"Құрылыстың түпкілікті құны мен жобаны іске асыру мерзімдері мемлекеттік сараптаманың оң қорытындысы алынғаннан кейін анықталады. Нысан құнының қымбаттауын болдырмау үшін орын санын көбейту жұмыстарын нысанның конструктивтік және жоспарлау шешімдерін түзету есебінен жүргізу жоспарланып отыр", - деп мәлімдеді Шымкент әкімдігі.

Шымкенттегі стадионның қауіпсіздігі төмендей ме?

Еске сала кетейік, аренадағы орын санын көбейту мәселесі жаңа стадионның іргетасы қаланып қойғаннан кейін жоспарлана бастаған болатын.

Біздің тілшіміз мамыр басында құрылыс алаңына барып қайтты, ол кезде болашақ аренаның қадалары (сваи) көрініп тұрған еді.

Біз сауалымызда орын санының мұншалықты айтарлықтай артуы қауіпсіздік тұрғысынан мәселе тудырмай ма деп нақтылауды сұрадық.

"Барлық ықтимал өзгеріс қажетті техникалық есептеулер жүргізілгеннен кейін, орнатылып қойған қадаларды ескере отырып және "ҚазҚСҒЗИ" АҚ-дан (КазНИИСА) арнайы техникалық шарттар алынған соң, мемлекеттік сараптамадан өткен соң және Қазақстан Республикасының құрылыс нормалары мен қауіпсіздік ережелерінің талаптарына қатаң сәйкестікте іске асырылады", - деп атап өтті әкімдік.

Шымкенттегі арена құрылысында не болып жатыр?

Еске сала кетсек, Шымкенттегі жаңа стадионның іргетасы 2024 жылдың маусым айында қаланған болатын. Алайда бір жылдан соң іргетас қаланған жерде тақыр дала ғана болды.

Фото: ©️ Tengrinews.kz / Роман Павлов

2026 жылдың мамыр айында жағдай өзгерді - нысанда белсенді жұмыстар, соның ішінде іргетасын көтеру жұмыстары жүріп жатты.

Фото: ©️ Tengrinews.kz / Әлімжан Аманжол

Бұл ретте нысанның құны әлі де нақтыланбаған. Шымкент әкімдігінің ақпараты бойынша, оны тек жобалау-сметалық құжаттаманы әзірлеу кезеңінен өткеннен кейін ғана анықтау мүмкін болады.

Шымкенттегі стадион Қазақстандағы ең үлкен аренаға айналуы мүмкін

Еске сала кетейік, тәуелсіздік алғаннан бері Қазақстанда үш ірі стадион салынды: "Астана Арена", "Түркістан Арена" және "Қайсар-Арена" (Қызылорда).

Қазіргі уақытта елордалық кешен еліміздегі футбол матчтерін өткізуге арналған ең үлкен алаң және ұлттық құраманың негізгі аренасы саналады.

Қазақстанның ең үлкен стадиондары

"Астана Арена" (30 мың 200 орын);
Алматыдағы Орталық стадион (23 мың 804 орын);
Қарағандыдағы "Шахтер" стадионы (19 мың орын);
Шымкенттегі Қажымұқан атындағы Орталық стадион (18 мың орын).

Сонымен қатар Алматы мен Ақтөбеде де жаңа ареналар салу жоспарланған. Алдын ала мәліметтер бойынша, Алматы стадионының сыйымдылығы шамамен 45 мың, ал Ақтөбедегі арена 35 мың орынды құрайды.

Осылайша, Шымкенттегі жаңа стадион сыйымдылығы бойынша қазақстандық стадиондар арасында рекорд орнатуы мүмкін.

Фото: Шымкент ішкі саясат басқармасы