38 жастағы ирландиялық спортшы өзін жұлдызды боксшы Сауль Альвареспен салыстырып, өзінің қоштасу жекпе-жегінің трансляция құқығын сату бойынша жеке рекордын жаңартуға тырысатынын айтты.
"Канелоның жекпе-жегі қанша қаралым жинады? Трибунада қанша көрермен болды? Касса қанша? Бұл адамдардың бәрінен сатылым бойынша асып түсемін. Әрі айтарлықтай басыммын. Бәрінен. Оңай. Тіпті бәрін қосқандағыдан да көп шығар. Мен тіпті күш салмаймын да.
Менің жекпе-жегім әлем чемпионатының жартылай финалымен тұспа-тұс келді, соған қарамастан мен барлық межеленген мақсаттарға қол жеткізе алдым - әрине, спортқа қайта оралмас бұрын, алдағы бірнеше ай бойы тағы да көптеген қиындықтарды еңсеруіме тура келеді.
Келесі жекпе-жегімді барынша жарнамалауға тырысамын. Соңғы жекпе-жегім. Қандай нәтижеге қол жеткізе алатынымды көрейік. Мен өз рекордтарымды жаңартуды жалғастыра беремін", - деп жазды Макгрегор X әлеуметтік желісінде.
Айта кетейік, Конор 2026 жылдың шілдесінде UFC-ге оралғанға дейін бес жыл бойы октагонға шықпаған болатын. UFC 329 турнирінде ол жарақат алып, Макс Холлуэйден техникалық нокаутпен жеңіліп қалды.
Конор жаңа жекпе-жегінің нақты уақытын жариялаған жоқ, бірақ 2026 жылы жазда ирландиялық спортшы 2027 жылдың жазында келесі Халықаралық жекпе-жек апталығында (International Fight Week - IFW) өтетінін айтқан болатын.
Макгрегор - UFC тарихындағы ең жоғары жалақы алатын файтер
Еске сала кетейік, Конор Макгрегор екі түрлі салмақ дәрежесінде UFC чемпионы атағын екі рет жеңіп алған.
Сонымен қатар ол промоушеннің ең танымал файтері - оның еншісінде жеке гонорарлар мен PPV (ақылы трансляция) сатылымы бойынша рекордтар бар. Лига тарихындағы ең табысты жекпе-жектердің топ-тізімінде бірден Конордың қатысуымен өткен жеті кездесу бар.
- Конор Макгрегор - Хабиб Нурмагомедов (UFC 229) - 2,4 миллион сатылым;
- Конор Макгрегор - Нейт Диаз 2 (UFC 202) - 1,65 миллион сатылым;
- Конор Макгрегор - Дастин Порье 2 (UFC 257) - 1,6 миллион сатылым;
- Конор Макгрегор - Нейт Диаз (UFC 196) - 1,6 миллион сатылым;
- Конор Макгрегор - Дастин Порье 3 (UFC 264) - 1,504 миллион сатылым;
- Конор Макгрегор - Эдди Альварес (UFC 205) - 1,4 миллион сатылым;
- Конор Макгрегор - Дональд Серроне (UFC 246) - 1,357 миллион сатылым.