Темірлан Анарбеков Чемпиондар лигасының үздік қақпашысы атанды

Танымал FlashScore статистикалық порталы "Қайрат" пен Қазақстан құрамасының қақпашысы Темірлан Анарбековті 2025/2026 жылғы Чемпиондар лигасының үздік ойыншылар құрамына қосты, деп хабарлайды Tengri Sport.

Портал нұсқасы бойынша, маусымның үздік командасына "Бавария", "Пари Сен-Жермен", мадридтік "Реал" және каталониялық "Барселонаның" жұлдызды ойыншылары енген. Кейн, Мбаппе, Ямаль және Кварацхелиямен қатар қазақстандық қақпашы да ерекше көзге түсті.

"Анарбеков ең жоғары рейтингке ие қақпашы болады деп кім ойлаған? "Қайрат" топтық кезеңде соңғы орын алды, бірақ олардың ең әлсіз команда болып, қақпасына өте көп соққы жасалуы оның осындай сәтті ойын көрсетуіне септігін тигізген болуы мүмкін.

Анарбеков 34 сейв жасады - сегіз қақпашы ғана бұдан көп соққы қайтарған. Ең бастысы, ол 72,3 пайыз соққы қайтару көрсеткішімен 4,39 голдың алдын алды, бұл қазақстандық қақпашы командасына қаншалықты қажет болғанын айқын көрсетеді", - деп атап өтілген порталда.

Айта кетейік, Темірлан Анарбековтің жалпы кезеңдегі алты ойын бойынша рейтингі 7,7 балл болды.

Финалға дейін жеткен "Арсенал" қақпашысы Давид Райяның Чемпиондар лигасындағы орташа рейтингі 7,4 балл болса, "Реал" қақпашысы Тибо Куртуаның көрсеткіші 7,5 балды құрады.

Фото: flashscore.com

Темірлан Анарбеков Чемпиондар лигасында марапат алған алғашқы қазақстандық

Еске сала кетейік, Қазақстан құрамасының қақпашысы Чемпиондар лигасының жалпы кезеңіндегі алғашқы екі матчта - "Спортингке" (4:1) және "Реалға" (0:5) қарсы ойындарда "Қайратқа" көмектесе алмады, кейін барлық алты ойынды негізгі құрамда өткізді.

Грекиялық "Олимпиакоспен" үйдегі матчта жеңіліс тапқаннан кейін Темірлан УЕФА-дан "Матчтің үздік ойыншысы" марапатын алды. Ол мұндай жүлдеге ие болған еліміздің алғашқы өкілі атанды.

Анарбековтің әсерлі ойыны оның еліміздегі ең танымал ойыншылардың біріне айналуына мүмкіндік берді (237 мың оқырман).

Еске сала кетейік, "Қайрат" Чемпиондар лигасының жалпы/топтық кезеңіне жолдама алған Қазақстандағы екінші команда болды. Команда сегіз матч өткізіп, оның жетеуінде жеңіліп, бір рет тең түсті.

Жалпы кезең қорытындысы бойынша команда турнир кестесінде соңғы орынды иеленді, ал Анарбеков соққыларды қайтару бойынша турнирдің үздік 3 қақпашысы қатарына енді.