“Титулды босатуы керек“: Әлімханұлы әлем чемпионы туралы пікір білдірді

Әлімханұлы нақты кім туралы айтып отырғанын ашып жазбады, бірақ қазіргі уақытта оның тарапы супер орта салмақтағы әлем чемпионы, ұлыбританиялық Хамза Ширазбен келіссөздер жүргізіп жатыр. Сондықтан бұл наразылық хаты ұлыбританиялық боксшыға бағытталған болуы әбден мүмкін.

"Ол бұл істі тым созып жіберді. Егер жұдырықтасқысы келсе, ашық айтып, жекпе-жекті ұйымдастырсын. Егер төбелескісі келмесе, титулды босатуы керек. Уақытымды босқа өткізгім келмейді", - деп мәлімдеді Әлімханұлы әлеуметтік желіде.

Әлімханұлы – Шираз: титулдық жекпе-жек бойынша келіссөздер

Еске салайық, Әлімханұлы орта салмақтағы WBO тұжырымы бойынша чемпиондық белбеуден өз еркімен бас тартқаннан кейін, ұйым оны супер орта салмақ дәрежесіндегі титулға міндетті үміткер деп жариялаған болатын.

WBO 14 тамыздан бастап қазақстандық боксшы мен қазіргі чемпион Шираздың өкілдеріне келіссөз жүргізуге 20 күн уақыт берген, бірақ кейін бұл мерзім ұзартылды. Қазақстан уақыты бойынша келіссөздер 18 қыркүйек түнгі сағат 00:00-ге дейін аяқталуы тиіс.

Сонымен қатар, Хамза Шираз сұхбат беріп үлгерді. Онда ол допинг дауынан кейін Әлімханұлының дисквалификациясын алып тастауды "бокс үшін масқара" деп атап, қазақстандықпен рингке шығу-шықпауына күмәні бар екенін айтқан.

Айта кетейік, осыдан екі жыл бұрын Шираз бен Әлімханұлы орта салмақта өнер көрсетіп жүргенде, олардың арасында жекпе-жек жоспарланған болатын. Сол кезде ұлыбританиялық көпшілік алдында Жәнібектің белбеуіне үміткер ретінде шығуға келіскенімен, кейін оның командасы келіссөздерден шығып кетті.

Нәтижесінде Шираз орта салмақтағы басқа белбеу үшін таласты, бірақ оның Карлос Адамеспен жекпе-жегі тең аяқталды. Осыдан кейін ұлыбританиялық жаңа салмақ дәрежесіне ауысып, WBO нұсқасы бойынша бос тұрған белбеуді иеленді.

Жәнібек Әлімханұлының менеджері Берік Сұлтан Tengri Sport тілшісіне берген сұхбатында Шираздың қарсылас ретінде қызық емес екенін, басты мақсат - жаңа салмақта белбеуді тезірек иелену екенін мәлімдеді.

"Жәнібек оны оңай нокаутқа түсіреді. Ол Джошуа, Тайсон Фьюри, Шакур немесе Кроуфорд сияқты супержұлдыз емес, олардың деңгейіндегі боксшы емес. Мұны бәрі біледі. Бізге тек оның титулы керек.

Жәнібек оны нокаутқа түсіргенде, бұл оның танымалдылығына еш әсер етпейді. Ол - жай ғана боксшы. Егер Жәнібек Кроуфордты, Канелоны немесе Мунгияны нокаутқа түсірсе, бұл оны автоматты түрде танымал етер еді", - деді ол тілшімізбен әңгімелесу барысында.

“Жыламай, төбелес!“: Әлімханұлы чемпионның айыптауына жауап берді