“Түлектерге арнаймын“: Астанада 55 жастағы мұғалім таңғаларлық рекорд орнатты

Астаналық 55 жастағы бастауыш сынып мұғалімі Айгүл Ержанова әлемдік рекорд орнатты, деп хабарлайды Tengri Sport. Ол салмағы 13,5 тонна болатын автобусты орнынан қозғап, сүйреп шықты.

25 мамырда қазақстандық әлеуметтік желі қолданушыларын 55 жастағы бастауыш сынып мұғалімі Айгүл Ержанова таңғалдырды. Ол бірегей әлемдік рекордтың иегері атанды.

Елорда тұрғыны (50 жастан асқан әйелдер арасында) салмағы 13,5 тонна автобусты бір минут ішінде 14 метр қашықтыққа сүйреп апарған әлемдегі алғашқы адам болды.

Бұдан кейін Айгүлге Global Best of Records алтын медалі табысталып, жетістігімен құттықтады. Фото: Астана қаласының Білім басқармасы

Tengri Sport тілшісіне берген сұхбатында мұғалім рекорд орнату идеясын бапкері айтқанын жеткізді.

"Нақты автобусты таңдауды маған бапкерім Айбар мен оның досы Ержан ұсынды. Маған бұл идея ұнады, сондықтан осы сынды қабылдап, рекордты дәл осы тәсілмен орнатып көруді ұйғардым", - деп бөлісті мұғалім.

Сондай-ақ ол бұл рекордты биыл мектеп бітіретін оқушыларға арнағанын айтты.

"Бұл рекордты мен биыл мектеп бітіретін түлектерге арнадым. Үлкен өмірдің табалдырығында тұрған жастарға жігер беріп, табандылықтың, еңбектің және өзіне деген сенімнің арқасында үлкен белестерді бағындыруға болатынын көрсеткім келді", - деді Айгүл.

Фото: Астана қаласының Білім басқармасы

Рекордшының айтуынша, жақын арада оған ресми GBR сертификаты, рекордтар кітабы және алмас мүсінше беріледі.

Жетістік құпиясы және Гиннесс

Әлемдегі ең басты рекордтар "мекемесі" – Гиннестің рекордтар кітабының сертификатын алу жоспары туралы сұраққа Айгүл: "бәрін уақыт көрсетеді" деп жауап берді және жаңа мақсаттарға жету үшін өз-өзімен жұмыс істеуді тоқтатпайтынын айтты.

Мұғалім рекорд орнатуға отбасының, жақындарының және оқушыларының қолдауы үлкен көмек болғанын атап өтті.

"Оқушыларым, ата-аналар, туыстарым мен әріптестерім мені шын жүректен құттықтап, қуанышымды бөлісті. Олардың қолдауы мен жылы лебіздері мен үшін үлкен мотивация болды. Бұл жетістік тек менің еңбегім емес, маған сенген және осы жолда әрдайым қолдау көрсеткен жандардың ортақ қуанышы деп білемін", - деді педагог.

Осындай жаста керемет пішінді сақтап қалудың құпиясын Айгүл халықтың ақ тілегімен, шабытпен және салауатты өмір салтымен байланыстырады.

"Меніңше, басты құпия – адамдардың игі тілектері мен салауатты өмір салтында. Ата-анам мен оқушыларымның жылы сөздері мені әрқашан шабыттандырып, күш береді. Бұдан бөлек, тұрақты түрде спортпен шұғылданудың және денсаулыққа мұқият қараудың арқасында жақсы физикалық дайындықты сақтап келемін", - деп жауап берді Айгүл.

Фото: Астана қаласының Білім басқармасы

Айта кетерлігі, мұғалімнің мұндай спорттық бабы – қажырлы еңбек пен жаттығудың нәтижесі. Айгүл Ержанова – кәсіби пауэрлифтер, бұл спортқа ол 52 жасында келген. Алайда жас ерекшелігі оның спортта табысқа жетуіне кедергі болмады. Алғашқы 1,5 жыл ішінде ол 45 медаль жеңіп алды, оның ішінде Мысырда өткен пауэрлифтингтен халықаралық чемпионаттың алтыны бар.