Шерханның анасы ұлының Алматыда өткен "Arystan cup" балалар турнирінде үздік форвард номинациясы бойынша алған марапатын көрсетті. Трофейге қарағанда, Шерхан бұл жүлдені 2022 жылы жеңіп алған, бірақ сол уақытта оның қақпашы болып ойнап жүргеніне бірнеше жыл болған еді.
"Бұл баламның алған марапаттарының жартысы ғана! Үздік қақпашы, сонымен қатар үздік шабуылшы", - деп жазды Сәуле Рабаева видеоның астына.
Айта кетейік, Шерхан Қалмұрза 2007 жылы Ақмола облысында дүниеге келген. Футболдағы алғашқы қадамдарын "Астана" футбол орталығында бастаған, бірақ 2022 жылдың күзінде "Қайрат" академиясына ауысқан болатын.
Бұл оқиғаның турнирге дейін немесе одан кейін болғаны белгісіз, себебі "Arystan cup" жыл сайын қарашада өтеді. 2022 жылы 2006-2007 жылғылар тобында дәл осы "Қайрат" академиясы жеңіске жеткен болатын.
Фото: instagram.com/sa_raby/
Еске сала кетейік, Шерхан Қалмұрзаның анасы бұған дейінгі сұхбаттарының бірінде ұлы карьерасын қорғаушы ретінде бастағанын айтқан болатын.
"Алдымен ол орталық қорғаушы позициясында ойнады. Егер гол жіберіп алса, ашуланып, қақпаның алдына тұрып алатын. Жаттықтырушы мұны байқап, оған қақпашы болуды ұсынды", - деп еске алды ол.
Дегенмен, бұл оқиға Шерханның өте жас кезіне қатысты, ал "Қайрат" академиясында ол бірден қақпашы орнына жайғасты.
Tengri Sport тілшісі мән-жайды білу үшін турнир ұйымдастырушыларына хабарласқанымен, Шерханның шабуылда ойнағанын нақты растайтын немесе теріске шығаратын ақпарат алған жоқ.
Шерхан Қалмұрза деген кім?
"Қайрат" қақпашысы 18 жасында негізгі құрамның қақпасын Чемпиондар лигасы матчтерінде, соның ішінде мадридтік "Реалға" қарсы ойында қорғағаннан кейін бүкіл елге танымал болды.
Бұл жағдай басқа екі қақпашы – Александр Заруцкий мен Темірлан Анарбеков бірінен соң бірі жарақат алып, маңызды ойындарға дейін қатарға қосыла алмағаннан кейін болды.
Шерханның қақпадағы сенімді ойыны оны сол сәтте елдегі ең танымал футболшыға айналдырды. Қазір оның Instagram парақшасына 265 мың адам жазылған - бұл көрсеткіш бойынша ол тек "Бернлидегі" Дастан Сәтпаев пен командаласы Темірлан Анарбековке жол береді.
Биыл Шерхан "Қайрат" сапында Қазақстан премьер-лигасында үш матч, Қазақстан Кубогі мен Еуропа лигасының іріктеу кезеңінде бір-бір матчтен өткізді. Сонымен қатар ол Бірінші лигада "Қайрат-Жастар" сапында 10 ойынға қатысты.
Сондай-ақ Қалмұрзаның есебінде Қазақстанның U-21 жастар құрамасы сапында бес матч бар.
Қазақстан құрамасының Ұлттар лигасындағы шешуші матчін қайдан, қашан көруге болады?