“10 спартандық“: команда соққылар саны бойынша 0:39 есебімен ұтылып, Кубок финалына шықты

Футболдан Украина кубогінің жартылай финалында бірегей жағдай тіркелді: бірінші дивизионда өнер көрсететін "Чернигов" командасы қарсылас қақпасына бірде-бір соққы бағыттамай-ақ "Металлист 1925" клубынан басым түсті, деп хабарлайды Tengri Sport.

"Металлист" айқын фаворит саналған матч қонақтар сапындағы ойыншының алаңнан қуылуымен басталды – жартылай қорғаушы Шушко қарсыласына дөрекі соққы жасап, әділетті түрде қызыл қағаз алды.

"Чернигов" ойыншылары он адам болып қалған соң, алаң иелері бірінен соң бірі қауіпті сәттер тудыра бастады, бірақ доп қақпаға мүлдем дарымай қойды. Кей сәтте қақпашы құтқарса, кейде доп бағана мен маңдайшаға тиіп жатты.

Матч бойы "Металлист" ойыншылары қарсылас қақпасына 39 соққы жасады, ал "Чернигов" бірде-бір рет соққы бағыттаған жоқ. Нәтижесінде ойын пенальти сериясына ұласты.

"Өмірімде көрген ең үздік матч. Черниговтық қақпашы нағыз шебер екен";

"Мұндайды әлі көрген емеспін!";

"Бұл нағыз масқара – 80 минут бойы сан жағынан басым болып, пенальтиден жеңілу. Бұлай жеңілу үшін де нағыз талант керек!";

"Бір жақта толық ойын және сан басымдығы, екінші жақта команданың шексіз төзімділігі мен қақпашының ерлігі. Бәрекелді, "Чернигов!" – деп жанкүйерлер кездесу қорытындысына пікір білдірді.

Кездесудің басты кейіпкері қонақтар қақпашысы Максим Татаренко болды – ол 12 сейв жасап, кейін бір соққыны қайтарып, командасының пенальти сериясында жеңіске жетуіне көмектесті. Sofascore статистикалық порталынан ол ең жоғары баға алды – 10 ұпай.

Бұл матчтың статистикасы тарихқа енері анық: соққылардың ерекше санынан бөлек, Кубоктан шығып қалған команда 4,01 xG көрсеткішін алды – яғни озық метрика бойынша 4 гол соғуға лайық ойын көрсеткен.

Фото: sofascore.com

Кездесу аяқталғаннан кейін "Черниговтың" бас жаттықтырушысы Валерий Черный өз шәкірттерін нағыз қаһармандар деп атады.

"Жігіттерге екі тайм және қосымша минуттар бойы атқарған орасан зор еңбектері үшін алғыс айтамын. Ойын жүйесін қайта құра білдік, бәрі біртұтас механизмдей қимылдады. Олар нағыз он спартандықтай шайқасты! Бұл жеңісті біздің керемет қаламыз, президентіміз бен жанкүйерлеріміз үшін иеленді", - деп маманның сөзін клуб сайты келтіреді.

Айта кетейік, Украинаның деңгейі жағынан екінші чемпионатының командасы ел кубогын 1/32 финалдан бастап, турнир барысында үш рет пенальти сериясында жеңіске жетті. Барлық кездесуде небәрі екі гол соғып, бір гол жіберген.

20 мамырда өтетін финалда "Чернигов" киевтік "Динамоға" қарсы ойнайды.

Бұған дейін "Торонто" қақпашысы Лука Гавран MLS тұрақты чемпионаты ойынында украиналық қақпашы Анатолий Трубиннің Чемпиондар лигасы аясында өткен "Бенфика" – "Реал" матчіндегі ғажайып голын қайталаған болатын.