Қазақша
Русский
АҚШ-тағы 103 жастағы невролог Говард Такер әлемдегі ең егде дәрігер атанып, Гиннестің рекордтар кітабына енді, деп хабарлайды Tengri Sport.
Америкалық невролог Говард Такер кәсіби қызметін 103 жасқа дейін жалғастырып, әлемдегі ең қарт дәрігер ретінде тарихта қалды. Гиннес рекордтар кітабы америкалық дәрігердің жетістігін ресми түрде мойындап, оны рекордшылар тізіміне қосты.
Доктор Такер 1947 жылдан 2022 жылға дейін дәрігерлік қызмет атқарып, өмірінің соңына дейін өз саласында жұмысын жалғастырған. 2021 жылдың өзінде, 98 жас 231 күн шағында ол әлемдегі ең егде тәжірибелі дәрігер ретінде танылған болатын.
Кейін оның бұл жетістігі жаңартылды: Такер 103 жас 83 күніне дейін еңбек етіп, абсолют рекорд орнатты. Дәрігер 2025 жылғы 22 желтоқсанда дүниеден өтті.
Кливлендтік (АҚШ) дәрігер ондаған жыл өмірін неврологияға арнап, университеттік ауруханаларда жұмыс істеді және Кливленд Клиник - Хиллкрест (Огайо штаты, АҚШ) ауруханасында бөлім меңгерушісі қызметін атқарды.
Сонымен қатар ол Кейс Вестерн Резерв университетінде болашақ дәрігерлер мен заң факультетінің студенттеріне дәріс берді: медицинадан бөлек, Такердің заңгерлік білімі де болған.
Тіпті COVID-19 пандемиясы кезінде де ол алдыңғы шепте болып, St. Vincent Charity медициналық орталығында пациенттерді емдеп, жас мамандарды оқытуды тоқтатпады.
Әріптестері мен шәкірттері оның ерекше диагностикалық қабілетін жоғары бағалайтын – ол күрделі зерттеулерсіз-ақ пациентті мұқият тыңдау арқылы нақты диагноз қоя білген.
Дәрігердің өмірінде отбасы мен адамдармен араласу ерекше орын алды. Оның төрт баласы мен он немересі бар. Немересі Остин Такер Гиннес рекордтар кітабы баспасөз қызметіне берген сұхбатында атасының басты қасиеті – білуге құштарлығы болғанын айтты.
"Ол 90 жастан асқанда да жаңа нәрселерге ашық болды, технологияларды және қоршаған ортаны түсінуге тырысты. Егер бір нәрсені білмесе, міндетті түрде үйренетін", - деп еске алады доктор Такердің немересі.
Дәрігердің өмір тарихы немересі мен режиссер Тейлор Тальяниетти бірлесіп түсірген "What’s Next?" атты деректі фильмінің негізіне айналды.
Жоба авторлары белсенді ұзақ өмір сүрудің маңыздылығын және аға буынның қоғамға қосатын үлесін көрсетуді мақсат еткен.
Говард Такер пациенттерінің есінде тек жоғары деңгейлі кәсіби маман ретінде ғана емес, әзілқой, мейірімді және жанашыр жан ретінде қалды. Ол әр пациентке жоспарланғаннан көбірек уақыт бөліп, қабылдауларда жиі бөгелетін.
Пәкістандық жекпе-жек шебері Гиннестің ерекше рекордын орнатты
+7 (777) 001 44 99
