9 жастағы бала Гиннесстің ерекше рекордын орнатты

Бейнеден алынған кадрлар

Қытайлық бала Сюаньи Генг Рубик текшесін құрастыру жылдамдығы бойынша Гиннес рекордының жаңа иегері атанды. Оған бұл үшін үш секундтан аз уақыт қажет болды, деп хабарлайды Tengri Sport.

Тоғыз жастағы бала бұған дейін де осы рекордқа иелік еткен, алайда оның жетістігін биыл ақпанда польшалық құрдасы жаңартқан болатын - ол текшені 2,76 секундта құрастырып шықты.

Бірнеше айдан кейін Сюаньи Генг бұл көрсеткішті тағы 25 жүздік секундқа жақсартты. Гиннестің рекордтар кітабы растаған жаңа рекорд - 2,51 секунд.

Айта кетейік, рекорд Рубик текшесінің ең көп таралған 3х3х3 (әр жағында 9 кіші текшесі бар алты жақты) модификациясында орнатылды.

Xuanyi Geng (9 жас), Рубик текшесін 2,51 секундта жинап, әлемдік рекордты жаңартты https://t.co/urCVJJa6VA
— ベトナムサラリーマン (@vnsalaryman) October 6, 2026

Жас рекордшы туралы не белгілі?

Қытайлық бала спидкубингпен бес жасынан бастап айналысады, сол кезде әкесі оған алғашқы Рубик текшесін сыйлаған екен. Оның бұған дейінгі әлемдік рекорды 3,05 секунд болатын.

"Мұның сыры табанды еңбекте болса керек және маған бұл текше қатты ұнайды", - деп бөлісті бала өз жетістігінің себебі туралы gancube-ке.

Сюаньи Генг логикалық жұмбақты шешумен қатар футбол ойнағанды, саяхаттағанды және кітап оқығанды жақсы көреді.

Айта кетейік, осыдан 11 жыл бұрын Рубик текшесін құрастырудың рекорд уақыты 5,25 секунд деп есептелетін. 2015 жылдан бері рекорд көрсеткіш екі еседен аса уақытқа жақсарды.

Бұған дейін 20 жастағы Астана тұрғыны Рубик текшесін көзін жұмып жылдам құрастыруымен Қазнетті таңғалдырған болатын.