98-минуттағы автогол Криштиану Роналдуды чемпиондық атағынан айырды

Әйгілі футболшы Криштиану Роналду өнер көрсететін Сауд Арабиясының "Әл-Наср" клубы "Әл-Хилалға" қарсы ойында жеңісті уысынан шығарып алды. Егер команда матч соңында өкінішті гол жіберіп алмағанда, португалдық ойыншы алғаш рет ел чемпионы атанар еді, деп хабарлайды Tengri Sport.

Сауд Арабиясы футбол чемпионатының матчі "Әл-Насрдың" сценарийі бойынша өрбіді. Команда 37-минутта-ақ бұрыштама добынан кейін есепте алға шықты.

Тайм соңында командада тағы бір гол соғатын мүмкіндік болды – ол қорғаушының қателігін пайдалана алмай, допты қақпа бағанына тигізді.

Екінші таймда "Әл-Хилал" белсендірек болғанымен, "Әл-Наср" қарымта шабуылдармен қысым көрсетуін тоқтатпады. 83-минутта Роналду алаңнан шығып, оның орнына Әл-Хамдан қосылды.

92-минутта төрешінің аутқа қатысты шешімі кенеттен эмоциялардың шарпуына ұласып, қос команда ойыншылары алаңда төбелесе жаздады.

Ал 98-минутта қақпашы Бенто шығуда қателік жіберіп, доп оның қолынан қақпаға еніп кетті. Ойын 1:1 есебімен тең аяқталып, бұл нәтиже Роналдуды мерзімінен бұрын чемпиондық атақ алу мүмкіндігінен айырды.

Еске сала кетейік, Криштиану Роналду Сауд Арабиясында өткізген үш жыл ішінде клубпен бірде-бір маңызды трофей ұтып алған жоқ.

"Әл-Насрға" чемпиондық үшін не қажет?

Айта кетерлігі, басты қарсыласымен өткен ойында тең түскеніне қарамастан, "Әл-Наср" әлі де чемпионаттың фавориті болып қала береді. Соңғы турда олар 15-орында келе жатқан "Дамакты" жеңуі керек немесе "Әл-Хилалдың" алдағы екі матчтың бірінде ұпай жоғалтуын күтуі тиіс.

Қазір турнир кестесінде "Әл-Насрдың" бес ұпай артықшылығы бар, бірақ қарсыласының қорында бір матчы артық. Бұл ретте, ұпайлар тең болған жағдайда, жеке кездесулердегі басымдығына байланысты чемпиондық атақ "Әл-Хилалға" беріледі.

Сауд Арабиясы чемпионатындағы командалардың орналасуы

1. "Әл-Наср" - 83 ұпай (34-тен 33 матч);
2. "Әл-Хилал" - 78 ұпай (32 матч);
3. "Әл-Ахли" - 75 ұпай (32 матч);
4. "Әл-Кадисия" - 71 ұпай (32 матч);
5. "Әл-Таавун" - 52 ұпай (32 матч);

Бұған дейін "Барселонаның" испандық вингері Ламин Ямаль карьерасында үшінші рет ел чемпионы атанған болатын. Роналду "Реал" сапында мұндай жетістікке тек екі-ақ рет қол жеткізген.