+7 (777) 001 44
99
Футболдан Португалия құрамасының жұлдызы Криштиану Роналду журналистің аргентиналық Лионель Месси туралы сұрағын соңына дейін тыңдамады. Португалиялық ойыншы микс-аймақтан ашулы күйде шығып кетті – видео әлеуметтік желілерде тарады, деп хабарлайды Tengri Sport.
Журналистердің бірі 2026 жылғы Әлем чемпионатының үздік сұрмергені атағына талас туралы Роналдудың пікірін білмек болды. Ол сұрағын "Месси екі гол соқты" деп бастағаны сол еді, португалиялық шабуылшы оның сөзін бөліп жіберді.
"Маған басқа ойыншылар бәрібір. Мбаппе де гол соқты", - деп журналистің сөзін шорт кескен Роналду камера объективінен алыстап кетті.
Бұл видео футбол жанкүйерлері арасында түрлі пікір тудырды. Бірі Роналдуды қолдаса, енді бірі аргентиналық туралы сұрақтар оның шамына қатты тиетінін атап өтті.
"Аңыз ойыншы 41 жасында әлі де тамаша бабында және алты Әлем чемпионатында гол соққан алғашқы ойыншы ретінде тарихқа енді. Оған Месси туралы қайта-қайта сұрақ қоя бергенше, осы сәттің рақатын көруге мүмкіндік беріңіздер", - деп жазды қолданушылардың бірі.
"Бұл адам Месси туралы ешқашан жақсы сөз айтқан емес, оған қарапайымдылық жат", - деп атап өтті екіншісі.
"Ха-ха, Мбаппе туралы соңғы сөзді айтуға қалай асықты десеңші!" - деп жазды үшіншісі.
"Мәселе Мессидің өте қарапайымдылығында, егер оған осындай сұрақ қойылса, ол Роналдуды құттықтар еді", - деді әлеуметтік желінің тағы бір қолданушысы.
Еске сала кетейік, Лионель Месси бұл Әлем чемпионатында қазірдің өзінде бес гол соғып, сұрмергендер жарысында көш бастап тұр.
Роналдуға келетін болсақ, ол Конго ДР-іне қарсы алғашқы матчта көзге түсе алмады, бірақ кейін Өзбекстан қақпасына екі гол салды.
Роналду мен Месси: екі ұлы футболшы
Криштиану Роналду мен Лионель Месси футболдағы жолын 2000-жылдардың басында бастады. Олардың арасындағы текетірестің нағыз қызған шағы екеуі де Испанияда өнер көрсеткен кезеңге тұспа-тұс келді – португалиялық "Реалда", ал аргентиналық "Барселонада" ойнады.
Лионель Месси титулдар саны бойынша рекорд орнатты. Ол Чемпиондар лигасы, Әлем чемпионаты және Америка кубогін қоса алғанда, 48 трофей жеңіп алды. Сонымен қатар ол сегіз рет "Алтын доп" иегері атанды – бұл рекорд көрсеткіш.
Instagram-дағы бұл жарияланымды көру
Криштиану Роналду кәсіби мансабында соққан голдар саны бойынша рекордқа ие – 975 гол. Жақын арада ол тарихтағы 1000 гол межесін бағындырған алғашқы ойыншы атануы мүмкін.
Дегенмен, Криштиану әзірге Әлем чемпионы атанған жоқ. Сірә, 2026 жылғы турнир Роналду үшін аңсарлы кубокті басына көтерудің соңғы мүмкіндігі болмақ.
Instagram-дағы бұл жарияланымды көру
Айта кетейік, Аргентина құрамасы топта бірінші орын алып, Әлем чемпионатының плей-офф кезеңіне жолдаманы ерте қамтамасыз етті.
Егер Португалия құрамасы өз тобында бірінші орын алса, Месси мен Роналдудың 1/4 финалда бетпе-бет кездесуіне мүмкіндік туады.
Роналдудың дублі Португалияға ӘЧ-2026 матчында Өзбекстанды талқандауға көмектесті
