ӘЧ-26: Роналдудың голы Португалияға плей-офф кезеңінде Хорватияны жеңуге көмектесті

Португалия құрамасы 2026 жылғы футболдан әлем чемпионатының 1/16 финалдық кезеңінде Хорватия командасын жеңді, деп хабарлайды Tengri Sport.

Ойын Торонтодағы "Би-Эм-О Филд" стадионында өтті. Матчтің 53-минутында есепті хорваттар ашты. Станишич оң қанаттан қарсыластың айып алаңына доп асырды, онда Матанович баспен соққы бағыттай алмағанымен, доп Перишичке барып түсті. Ол қақпа алдынан Португалия құрамасының қақпасын дәл көздеді.

Португалия құрамасының шабуылшысы Криштиану Роналду матчтің 68-минутында пенальтиді сәтті орындап, есепті теңестірді. Ал 90+4-минутта Леаудың қанаттан асырған добынан кейін Гонсалу Рамуш португалиялықтарды алға шығарды.

90+13-минутта Гвардиол гол соққан болатын, бірақ VAR жүйесі тексергеннен кейін хорваттардың голы жоққа шығарылды.

Криштиану Роналду әлем чемпионаттарының плей-офф кезеңіндегі өзінің алғашқы голын соқты. Ол 2026 жылғы ӘЧ плей-офф кезеңінде көзге түскен ең егде футболшы атанды. Португалиялық шабуылшы бұл нәтижеге 41 жасында қол жеткізді. Бұл гол Роналдудың мансабындағы 976-шы голы болды.

ӘЧ-2026 11 маусым мен 19 шілде аралығында Канада, АҚШ және Мексикада өтіп жатыр. Аргентина құрамасы – қазіргі әлем чемпионы.