АФК да Әлем чемпионатына қарсы байкотқа қосылды

Сурет: depositphotos.com

Азия футбол конфедерациясы (АФК) әлем чемпионатынан түсетін табысты бөлудің жаңа ережелеріне қарсы шыққан УЕФА мен КОНКАКАФ-тың ұстанымын қолдады, деп хабарлайды Tengri Sport АФК баспасөз қызметіне сілтеме жасап.

Егер ФИФА мундиальдарды басқаратын тәуелсіз коммерциялық ұйым құру жоспарынан бас тартпаса, УЕФА мен КОНКАКАФ болашақ әлем чемпионатына бойкот жариялайтынын мәлімдеді.

Азия тарапы Еуропа мен Америкадағы әріптестеріне қолдау білдірді.

"Азия футбол конфедерациясы УЕФА және КОНКАКАФ-пен ынтымақтастығын білдіре отырып, ФИФА-ның негізгі жарыстарға жеке инвестиция тарту туралы ұсынысына және FFE (Футбол және спорт федерациясы) қатысты шешім қабылдау процесіне айтарлықтай алаңдаушылық білдіреді.

Жағдайдың әлем чемпионатына бойкот жариялау мүмкіндігі қоғамдық талқылау деңгейіне жетуі - осы ойынның болашағына бейжай қарамайтын жандардың барлығын мазалауы тиіс. Футбол мұндай күйге ешқашан түспеуі керек еді", - делінген мәлімдемеде.

ФИФА-ның "ешкім футболды сатып жатқан жоқ" деген түсініктемесі АФК-ның ұстанымына әсер етпегені атап өтілді.

"АФК бұл мәселе бір ғана ұсыныс шеңберінен шығып кетті деп санайды. Керісінше, бұл жағдай ФИФА-ның кеңесу және шешім қабылдау процестеріндегі түбегейлі кемшіліктерді ашып берді, оларды енді жою қажет.

АФК ФИФА-ның бұл ұсыныс бойынша соңғы түсініктемелерін назарға алғанымен, басқаруға, институционалдық процестерге және мазмұнды кеңестерге қатысты негізгі сұрақтар әлі де жауапсыз қалып отыр.

Әлемдік футболдың коммерциялық, спорттық және стратегиялық болашағына әсер ететін мұндай ауқымды ұсыныс конфедерацияларды, мүше қауымдастықтарды және тіпті ФИФА-ның өз басқару органдарын, соның ішінде ФИФА Кеңесін бейхабар қалдыратын процестер аясында қабылданбауы тиіс", - деп санайды АФК өкілдері.

УЕФА Әлем чемпионатына бойкот жариялады: қақтығыстың мәні неде?

Еске сала кетейік, БАҚ мәліметінше, ФИФА әлем чемпионаты мен клубтық әлем чемпионатын басқаратын FIFA Forward Enterprise еншілес компаниясын құруды жоспарлап отыр.

Бұл келісім ұйымға 4 миллиард доллардан астам табыс, ал ФИФА президенті Джанни Инфантиноға жеке бонустар әкелуі мүмкін деп есептеледі. Ол ФИФА басшылығындағы президенттік мерзімі аяқталғаннан кейін жаңа компанияның жетекшісі болуы ықтимал.

УЕФА мен басқа да құрлықтық футбол бірлестіктері ФИФА-ның бұл әрекетін футболды коммерцияландыру деп санайды.

Бұл ретте түпкілікті шешім жалпы дауыс беру нәтижесіне байланысты болмақ. ФИФА құрамына 211 ел кіреді, бірақ егер Азия, КОНКАКАФ аймағы және УЕФА ортақ позиция ұстанса, әлем чемпионатын қаржыландырудың жаңа моделі мақұлданбайды.

Естеріңізге сала кетейік, УЕФА-ға (Еуропа) 55 ел (оның ішінде Қазақстан), КОНКАКАФ-қа (Солтүстік, Орталық Америка және Кариб бассейні) — 41, ал АФК-ға (Азия) — 47 ел мүше.