Әлем чемпионаты: Германия - Парагвай арасындағы 1/16 финалдық матч сенсациямен аяқталды

29-нан 30-маусымға қараған түні Парагвай құрамасы 2026 жылғы әлем чемпионатының 1/16 финалдық матчінде Германия командасын жеңді, деп хабарлайды Tengri Sport.

Еске сала кетейік, немістер Кюрасао мен Кот-д'Ивуарды жеңіп, бірақ соңғы матчта Эквадордан ұтылып, 6 ұпаймен Е тобында бірінші орын алған болатын.

Өз кезегінде парагвайлықтар төрт ұпай жинап, плей-офф кезеңіне үшінші орынмен шықты: олар АҚШ-тан жеңіліп, Түркияны ұтты және Австралиямен тең ойнады.

Ойын барысы

Бірінші таймда, 42-минутта, Парагвай есеп ашты. Вингер Хулио Энсисо қапталдан асырылған допты басымен қақпаға бағыттады.

Германия екінші таймның басында, 54-минутта есепті теңестірді. Жартылай қорғаушы Флориан Виртц алыстан дәл пас асырып, Кай Хавертцті тапты, ал ол допты қақпаға тоғытты.

Екінші таймнан кейінгі есеп - 1:1.

Алғашқы қосымша таймның 102-минутында Германия алға шығуы мүмкін еді, бірақ матчтің бас төрешісі қорғаушы Джонатан Таның салған голын ереже бұзылуына байланысты есепке алмады.

Қосымша уақыт голсыз аяқталды.

Германия - Парагвай пенальти сериясы

Немістер сериядағы алғашқы соққысын орындай алмады, Кай Хавертц қарсылас қақпашысынан айласын асыра алмады. Өз кезегінде парагвайлық Маурисио өз мүмкіндігін мүлт жібермей, Парагвайды алға шығарды.

Содан кейін Германия сапында Йозуа Киммих пен Джамал Мусиала дәлдік танытса, Парагвайдан Густаво Гомес пен Матиас Галарза қателескен жоқ.

Төртінші мүмкіндікті екі команда да пайдалана алмады: Ник Вольтемаде парагвайлықтардың қақпашысын жеңе алмаса, Антонио Санабриа допты қақпадан қиыс соқты.

Бесінші соққыда Надием Амири гол соғып, Германияның үмітін сақтап қалды, ал Фабиан Бальбуэна Мануэль Нойер тосқауылынан өте алмады.

Алтыншы соққыда Джонатан Та допты қақпадан биік асырса, Хосе Канале мүлт кетпей, серияны нүктесін қойды.

Пенальти сериясының есебі - Парагвайдың пайдасына 4:3.

Осылайша, Парагвай құрамасы ӘЧ-2026 турнирінің 1/8 финалына шықты, онда олар Франция - Швеция жұбының жеңімпазымен кездеседі. Бұл матч 4-нен 5-шілдеге қараған түні Қазақстан уақытымен сағат 02:00-де өтеді.

Еске сала кетейік, өткен түнде Бразилия құрамасы Жапонияны жеңіп, келесі кезеңнің екінші қатысушысы атанды.