Арина Соболенко кешке қатысқаны үшін жемқорлық бойынша айыпталуы мүмкін

Бұған дейін Арина Соболенко, Серена Уильямс, Кори Гауфф, Мирра Андреева және Тейлор Фрицтің US Open қарсаңындағы жарнамалық кешке қатысқаны хабарланған болатын.

Шараны белгілі кәсіпкер Дэвид Грутман ұйымдастырған, ал оның серіктестерінің бірі америкалық DraftKings букмекерлік компаниясы болды.

Шарадан түсірілген фотосуреттерден теннисшілердің компания логотипі бар қабырғаның алдында суретке түсіп тұрғанын көруге болады.

Танымал теннис журналисі Бен Ротенберг өзінің әлеуметтік желілерінде спортшылардың мұндай шараға қатысуы қолданыстағы сыбайлас жемқорлыққа қарсы нормаларға қайшы келуі мүмкін екенін мәлімдеді.

Оның айтуынша, теннис матчтеріне бәс тігетін букмекердің жарнамалық акциясына теннисшілердің ұйымдасқан түрде қатысуы ережелерді бұзуы мүмкін. Бұл Теннис өнегелілігін қамтамасыз ету халықаралық агенттігінің (ITIA) оларға бейресми ескерту жасауына негіз болуы ықтимал.

Тіпті кешке қатысқаны үшін DraftKings тарапынан тікелей төлемдер жасалмаса да, шараға қатысудың өзі және бренд аясындағы фотосессия Tennis Anti-Corruption Programme талаптарына қайшы келуі мүмкін.

Регламентте (D.1.b тармағы) осы ережелер қолданылатын бірде-бір тұлға тенниске бәс тігуді тікелей немесе жанама түрде қолдауға, көтермелеуге немесе жарнамалауға құқылы емес екендігі бекітілген.

D.1.q тармағы букмекерлік компанияларды жарнамалауға, оларға жұмыс істеуге, олардан демеушілік көмек алуға немесе олармен жеке өзі, делдалдар немесе заңды тұлғалар арқылы қандай да бір байланыста болуға қосымша тыйым салады.

Айта кетейік, Дэвид Грутман бұған дейін де теннисшілер мен букмекерлердің қатысуымен осындай іс-шаралар өткізген. Атап айтқанда, ол 2025 жылғы Miami Open қарсаңында және турнир кезінде жабық кешкі астар ұйымдастырды. Онда Карлос Алькарас, Новак Джокович, Григор Димитров, Маттео Берреттини, Арина Соболенко, Донна Векич және тағы басқа әлемдік теннис жұлдыздары болған еді.

Бұдан бұрын US Open матчінен кейінгі баспасөз мәслихатында Арина Соболенко журналистің турнир алдындағы "кештер" мен көңіл көтеру туралы сұрағына қатаң жауап берген болатын.

Репортер спортшыдан турнир басталғаннан кейінгі көңіл күйін сұрап, өткен аптада теннисшінің қатысуымен көптеген кеш пен корттан тыс белсенділіктер болғанын айтып өтті. Соболенко бұл сұраққа шорт кесіп жауап берді.

Журналист өзін ақтап алуға тырысып, тек кештерді емес, жалпы іс-шаралар мен көрініп қалуларды меңзегенін түсіндірмек болды, бірақ Соболенко оның сөзін бөліп жіберіп, "бірдеңе айтпас бұрын ойлану" керектігін ескертті.

Бұған дейін Қазақстанның бірінші ракеткасы Елена Рыбакинаның АҚШ ашық чемпионаты - US Open 2026 турнирінің үшінші айналымына шыққаны белгілі болды.