+7 (777) 001 44
99
Әлемдегі ең атақты теннисші сербиялық Новак Джокович Үлкен дулыға турнирлерінің сыйақы қорына байланысты теннисшілердің бойкотын қолдайтынын мәлімдеді, деп хабарлайды Tengri Sport.
Бұған дейін "Ролан Гаррос" турнирінің айналасында үлкен дау туындаған болатын. Ұйымдастырушылар 2026 жылы турнирдің сыйақы қоры өсетінін жариялағанымен, көптеген теннисші бұл өсімді жеткіліксіз деп санайды.
Арина Соболенко бастаған бір топ ойыншы ұйымдастырушыларды сынаған ашық хатқа қол қойды. Соболенконың өзі егер теннисшілерге төленетін төлемдер айтарлықтай өспесе, турнирге бойкот жариялауға дайын екенін айтты.
Әйгілі сербиялық теннисші Новак Джокович сыйақыны көбейту үшін жарыстарға бойкот жариялаған ойыншыларды қолдайтынын жеткізді.
Теннисшінің айтуынша, ықпалды ойыншылар ортақ игілік жолында жауапкершілікті өз мойнына алып, мұндай мәселелерді шешуі тиіс.
"Ойыншылар менің қолдауыма әрқашан сенуге болатынын біледі, бар болғаны осы. Жаңа буын келе жатыр және Соболенко сияқты спортымыздың көшбасшылары жауапкершілікті өз мойнына алуға, теннис саясатының қалай жұмыс істейтінін түсінуге, қыр-сырын ұғынып, тек өз пайдасы мен амандығы үшін емес, барлығы үшін не істеу керектігін түсінуге дайын екеніне қуаныштымын.
Біз бәріміз – бір спорттың бөлшегіміз. Ойыншылар болсын, турнирлер немесе басқарушы органдар болсын, бәріміз теннисті жаңа деңгейге көтеруге тырысамыз. Өкінішке қарай, кейбір адамдар шешкісі келмейтін мүдделер қақтығысы жиі туындайды. Меніңше, дәл осындай сәтте ойыншылар нағыз күшке ие", - деді Джокович.
Сондай-ақ Джокович бұл мәселені бұрын да көтергенін, бірақ оның сөздері жиі басқаша түсіндірілгенін атап өтті.
Теннисшінің айтуынша, оның негізгі мақсаты – қаржы тапшылығынан спорттан кетіп жатқан рейтингі төмен теннисшілерге қолдау көрсету.
"Сондай-ақ бұрын менің сөздерімнің жиі бұрмаланғанын айта кеткен жөн, әсіресе "Үлкен дулыға" турнирлерін жеңіп алған кезде де өзім үшін көбірек ақша талап етіп жатқандай көрсетті. Бірақ біз рейтингі төмен ойыншылар, кәсіби теннистің негізі, қаржы тапшылығынан қиындық көріп, спорттан кетіп жатқандар туралы айтып отырмыз. Рейтингі төмен ойыншылар үшін ешқандай экономикалық кепілдік жоқ мұндай жағдайдағы жалғыз жаһандық спорт түрі біз шығармыз деп ойлаймын", - деп толықтырды ол.
Новак Джокович сыйақы қорына қатысты дауға байланысты ойыншылардың Үлкен дулыға турнирлеріне бойкот жариялауын қолдайтынын айтты.
— Danny (@DjokovicFan_) 8 мамыр, 2026
Джокович: "Ойыншылар әрқашан менің қолдауыма ие болады. Теннис – рейтингі төмен ойыншылар үшін қаржылық кепілдіктер жоқ әлемдегі жалғыз жаһандық спорт түрі. Бұны өзгерту керек".pic.twitter.com/zIY3fKPzU5
Еске сала кетейік, бұл бастаманы қазақстандық теннисші, әлемнің екінші ракеткасы Елена Рыбакина да қолдаған болатын.
Италияның ашық чемпионатындағы баспасөз мәслихатында қазақстандық спортшыдан бойкот туралы бастаманы қолдайтын-қолдамайтыны сұралды.
Теннисші егер спортшылардың көпшілігі қатысса, өзінің де қосылатынын айтты.
"Бұл күрделі мәселе. Бұған дейін де ойыншылар бірігіп, бойкот жариялауына болатын жағдайлар көп болған, бірақ ол ешқашан жүзеге асқан емес. Шыны керек, білмеймін. Егер көпшілік бойкот жариялаймыз және ойнамаймыз десе, әрине, мен де қосыламын. Бұл қиындық тудырмайды", - деп жауап берді Рыбакина.
Дегенмен ол мәселе тек сыйақы мөлшерінде емес, теннисшілердің сол ақшадан төлейтін орасан зор салықтарында деп санайды.
"Бірақ мен өзгерістер тек "Дулыға" турнирлерінде емес және тек сыйақы тұрғысынан емес, басқа да бағыттарда қажет деп санаймын. Көпшілік біздің өте жоғары салықтарымыз туралы біле бермейді. Тіпті көп табыс тапсаң да, оның қомақты бөлігі соған кетеді. Бұл бөлек тақырып. Бойкот туралы айту қиын: айтып өткенімдей, осы жылдар ішінде мәселе көп болды, бірақ ойыншылар бірдеңені өзгерту үшін әлі бірде-бір рет нағыз бірлік танытқан емес", - деп толықтырды теннисші.
Елена Рыбакинаның бүгін Римде өткен толық баспасөз мәслихаты.#Ibi26
— Sebastien G. (@sebsharfam2) 2026 жылғы 5 мамыр
📸tournament/ Youtube pic.twitter.com/YoLtMMTZc4
Новак Джокович – теннис аңызы
Новак Джокович ерлер теннисіндегі абсолютті рекордшы. Сербиялық чемпион "Үлкен дулыға" турнирлерінің 24 титулын жеңіп алды, бұл спорт тарихындағы кез келген басқа ойыншыдан көп. Ол 9 рет Australian Open жеңімпазы атанды, үш рет Roland Garros кубогын иеленді, 7 рет Уимблдон турнирінде топ жарды және US Open додасында 4 мәрте жеңіске жетті.
Өзінің ұлы мансабында Новак Джокович 193 миллион доллардан астам (89,7 миллиард теңгеден астам) сыйақы алған.
Instagram-дағы бұл жарияланымды көру
“Мен де қосыламын“: Елена Рыбакина жүлде қорына байланысты теннисшілердің бойкоты туралы айтты
