“Барселона“ аңызы ЧЛ-дағы ірі жеңістен кейін “Манчестер Юнайтедті” сынға алды

Фото: lakasa studyo/depositphotos.com

Италиялық "Комоның" бас бапкері әрі "Барселонаның" бұрынғы ойыншысы Сеск Фабрегас Чемпиондар лигасының "Манчестер Юнайтедке" қарсы матчінде есеп 4:0 болған кезде командасына қарқынды бәсеңдетуді арнайы тапсырғанын айтты, деп хабарлайды Tengri Sport.

Чемпиондар лигасының жалпы кезеңіндегі матч италиялықтардың пайдасына 4:1 есебімен аяқталды, ал "Манчестер Юнайтед" жұбаныш голын тек 91-минутта ғана соға алды.

Тәлімгердің айтуынша, матчтің соңғы 10 минутында команда оның нұсқауына байланысты нашар ойнаған.

"Соңғы он минут үшін өкінемін, өйткені командадан қарқынды бәсеңдетуді өзім сұрадым: алда бізді тағы бір матч күтіп тұр, ал 4:0 есебі кезінде жағдайды сәл бақылауда ұстауға мүмкіндігіміз болды. Мен ойыншыларға алға жүгіруді тоқтатып, алаң ортасында қалуды айттым. Бұған өкінемін, өйткені өзім олардан әрқашан соңына дейін күресуді талап етемін. Жіберіп алған гол көңілімді түсірді, себебі біз қарқынды бәсеңдетіп, қорғаныс шебін төмендетіп алдық. Бірақ бұл менің қателігім", - деді ол.

Әлеуметтік желілердегі көптеген жанкүйер Фабрегастың бұл әрекетін "Манчестер Юнайтедке" көрсетілген құрметсіздік деп санайды.

"Мәссаған, мынау нағыз құрметсіздік қой. Саған бір "рахмет" айту аз болады, Фабрегас";

"Егер команда әлі де Моуриньюдің қол астында болса, ол міндетті түрде айқай-шу шығарар еді - ешқандай құрмет жоқ", - деп жазды олар.

FABREGAS: “I TOLD THEM TO SLOW DOWN AT 4-0!” 😳 Como 4-1 Man Utd 🏆 Champions League https://t.co/HP9eGesDHO
— BeanymanSports (@BeanymanSports) October 21, 2026

Айта кетейік, "Манчестер Юнайтед" кейінгі жеті матчте жеңіске жете алмай келеді. Команда соңғы рет 11 қыркүйекте Чемпиондар лигасы аясында Әзербайжанның "Сабах" клубына қарсы ойында жеңіске жеткен болатын.

Сеск Фабрегас деген кім?

39 жастағы Сеск Фабрегас ойыншы ретіндегі мансабын 2023 жылы аяқтады. Ол "Барселона", "Арсенал", "Челси", "Монако" және "Комо" клубтарында өнер көрсеткен.

Сеск Испания құрамасымен бірге әлем чемпионы және екі дүркін Еуропа чемпионы атанды, сондай-ақ "Барселонамен" Испания чемпионы және "Челсимен" екі рет Англия чемпионы атанған.