Бивол Бетербиевпен трилогиядан бас тарту себебін атады

Жартылай ауыр салмақта WBA Super, IBO, IBF және WBO нұсқалары бойынша әлем чемпионы Дмитрий Бивол Артур Бетербиевке қарсы үшінші жекпе-жек неге өтпей қалғанын айтып берді, деп хабарлайды Tengri Sport тілшісі Sport24.ru-ға сілтеме жасап.

Ақпарат көзіне берген сұхбатында танымал боксшы Дмитрий Бивол бұрынғы абсолют әлем чемпионы Артур Бетербиевпен трилогия өткізуге не кедергі болып жатқаны туралы сұраққа жауап берді.

Биволдың айтуынша, үшінші жекпе-жектен бас тарту себебі – батыс жұртшылығы тарапынан қызығушылықтың болмауы.

"Ресейлік көрермен үшін біздің трилогиямыз қызықты. Қазір оның батыс көрерменіне қаншалықты қызықты екенін білмеймін. Бірақ батыс көрермені үшін бұл бірінші және екінші жекпе-жектегідей қызықты емес. Үшіншісіне деген ынта төмендеп кетті, сондықтан ұйымдастырушылар тарапынан нақты әрекеттер болған жоқ. "Келіңіздер, бокс өткізейік" деген сияқты ұсыныстар болды, бірақ бұл маңызды талқылау деңгейіне жеткен жоқ. Кейін мен жарақат алып қалдым, ал жарақаттан кейін бұл мәселе тағы да сиырқұйымшақтанып кетті", - деп жауап берді Бивол.

Сондай-ақ Бивол жекпе-жектің қаржылық мәселесін де маңызды фактор деп санайды. Оның айтуынша, батыстық инвесторлар жекпе-жектен күтетін табысын ала алмайды.

"Промоутерлер мен менеджерлер тобын бұл онша қанағаттандырмайды. Ұйымдастырушылар үшін де бұл аса қызық емес, өйткені олар ерекше дивидендтер алмайды. Бұл бизнес қой. Ұйымдастырушылар өзі қалаған қайтарымды ала алмайды", - деп толықтырды боксшы.

Бивол - Бетербиев трилогиясын барлық жанкүйер күтіп жүр

Естеріңізге сала кетейік, боксшылар Дмитрий Бивол мен Артур Бетербиев рингте екі рет кездескен болатын, екі жекпе-жек те жартылай ауыр салмақтағы абсолют әлем чемпионы атағы үшін өтті.

Бірінші жекпе-жек 2024 жылдың 13 қазанында Эр-Риядта (Сауд Арабиясы) өтіп, төрешілер шешімімен Бетербиевтің жеңісімен аяқталды.

Қарымта кездесу 2025 жылдың 22 ақпанында сол Эр-Риядта өтті. Боксшылар тағы да төрешілер шешіміне дейін жетті, бірақ Бивол есе қайтарып, "абсолют" титулын жеңіп алды.

Осыдан кейін үшінші жекпе-жек сұранып тұрған еді, бірақ Биволдың командасы боксшының 2025 жылы рингке шыға алмайтынын мәлімдеді.

Дмитрий Биволдың келесі жекпе-жегі 30 мамырда Екатеринбургтегі (Ресей) УГМК Аренада өтеді. Оның қарсыласы неміс боксшысы Михаэль Айферт болмақ. Бәске ресейлік боксшы иелік ететін IBF және WBA белбеулері тігіледі.