Испания - Бельгия: Әлем чемпионатының 1/4 финалын қайдан көруге болады?

Фото: depositphotos.com

Бүгін, 11 шілдеге қараған түні футболдан Әлем чемпионатының екінші ширек финалдық матчі өтеді. Алаңға Испания мен Бельгия құрамалары шығады, деп хабарлайды Tengri Sport.

ӘЧ-2026 1/4 финалдық кездесуі Лос-Анджелестегі (АҚШ) "Соу-Фай" стадионында өтеді. Жеңімпаз жартылай финалда Франция құрамасына қарсы ойнайды.

Испания - Бельгия: текетірес тарихы

Тарихи тұрғыдан алғанда, бельгиялықтар испандар үшін оңай қарсылас болды. Командалар 22 рет кездесіп, соның 12-сінде Пиреней түбегінің өкілдері жеңіске жеткен.

Сонымен қатар бельгиялықтардың кейінгі жеңісі осыдан 40 жыл бұрын тіркелген. 1986 жылы олар Әлем чемпионатының 1/4 финалында Испанияны пенальти сериясында қапы қалдырған болатын. Алайда келесі турнирде испандар топтық кезеңде есе қайтарды.

Кейінгі бес ойында (біреуі жолдастық, төртеуі Әлем чемпионатының іріктеу кезеңі) Бельгия құрамасы небәрі бір гол соғып, өз қақпасына 13 доп өткізіп алды.

Испания мен Бельгия ӘЧ-2026 турнирінде

Командалардың биылғы мундиалдағы жолы әртүрлі. Испандар турнирді Кабо-Вердемен күтпеген жерден голсыз тең түсуден бастағанымен, қалған төрт матчте жеңіске жетіп, бірде-бір гол жіберген жоқ.

Де Ла Фуэнте шәкірттері шабуыл әлеуеті зор Уругвай, Австрия және Португалия құрамаларымен кездесті. Португалиялықтармен ойын Криштиану Роналдудың әлем чемпионаттарындағы соңғы матчі ретінде тарихта қалады.

Бельгиялықтар екі тең ойынмен бастады – Мысырмен 1:1 және Иранмен 0:0, тек топтық кезеңнің соңғы матчінде голдың астына алды (Жаңа Зеландиямен 5:1).

1/16 финалда Сенегал құрамасымен ойында нағыз камбэк жасалды – 86-минутқа дейін олар 0:2 есебімен ұтылып жатып, қосымша уақытта 3:2 есебімен жеңісті жұлып алды.

Ал 1/8 финалда АҚШ футболшылары ғана емес, ФИФА-ның төрешілер комитеті де Бельгияға қарсы болғандай көрінді. Комитет бұрын-соңды болмаған шешім қабылдап, америкалық форвардтың дисквалификациясын алып тастады.

Бірақ бұл АҚШ құрамасына көмектескен жоқ – 4:1 есебімен жеңген Бельгия ширек финалға шықты.

Испания - Бельгия: басты жұлдыздар

Екі команда сапындағы ең үлкен шығын деп бельгиялық жартылай қорғаушы Амаду Онананы айтуға болады – ол америкалықтармен матчте тізе байламын үзіп алды. Қалған ойыншылар сақадай сай.

Instagram-дағы бұл жарияланымды көру

Belgian Red Devils (@belgianreddevils) жарияланымы

Жанкүйерлерді "Реал" мен "Барселона" текетіресінің кезекті сериясы күтіп тұр. Испандардың басты жұлдызы әрі бүгінде әлемнің ең қымбат футболшысы – каталониялық Ламин Ямаль. Оған "Реал" сапындағы әлемнің үздік қақпашыларының бірі Тибо Куртуа қарсы тұрмақ.

Instagram-дағы бұл жарияланымды көру

@lamineyamal парақшасынан жарияланым

Ямальдан бөлек, алаңға "Барселонаның" өзге де ойыншылары шығады: Педри, Кубарси, Ольмо. Бельгиялықтар бұған аңызға айналған Кевин де Брюйнемен, сондай-ақ "Манчестер Ситидің" тағы бір өкілі Джереми Докумен жауап бермек.