Жұлдызды боксшы метродағы шабуылдан кейін 40 жасында қайғылы қазаға ұшырады

Бокс әлемін суыт хабар дүр сілкіндірді. "Орыс Тайсон" деген лақап атпен танымал ресейлік ауыр салмақтағы боксшы Денис Бойцов 40 жасында қайтыс болғаны белгілі болды.

Денис Бойцовтың қайғылы оқиғасы 2015 жылдың мамырында басталды. Сол кезде 29 жастағы боксшы Берлин метросының "Бисмаркштрассе" және "Вильмерсдорфер-штрассе" бекеттері арасындағы жолдан ес-түссіз күйде табылған. Оның басы мен қолы ауыр жарақаттанған еді.

Спортшы жасанды комаға түсіп, бірнеше ота жасалды. Алайда ол толық айыға алмады: өмірінің соңғы жылдарында Бойцов жүре де, сөйлей де алмай, жақындарымен негізінен ым-ишара арқылы түсінісетін. Оқиғаға кінәлілер ресми түрде әлі анықталған жоқ.

Денис Бойцов бокс жұлдызы болған

Денис Бойцов 1986 жылы 14 ақпанда Орёл қаласында (Ресей) дүниеге келген. Бокспен бес жасынан бастап айналысқан. Әуесқой рингте 130 жекпе-жек өткізіп, 115 жеңіске жеткен. Оның жетістіктері арасында кадеттер (2001 және 2002 жылдар) мен жасөспірімдер (2004 жыл, аса ауыр салмақ) арасындағы әлем чемпионаттарының алтын медальдары бар.

Кәсіпқой боксқа 2004 жылы ауысып, негізінен Германияда өнер көрсетті. Агрессивті стилі, жойқын соққысы және мерзімінен бұрын жеңістерінің көптігі оған тез арада "Орыс Тайсон" деген лақап ат алып берді.

Бойцов өз мансабында 37 кәсіпқой жекпе-жек өткізді: 36 жеңіс (оның 27-сі нокаутпен) және бір жеңіліс. Ол ауыр салмақта WBC Youth, WBA Intercontinental және WBO European титулдарын иеленді. Ұзақ уақыт бойы жеңіліс көрмей, әлем чемпионы атағына басты үміткерлердің бірі, соның ішінде Владимир Кличконың ықтимал қарсыласы ретінде қарастырылды.

2012 жылдың аяғында Денис Бойцов пен Тайсон Фьюри арасындағы жекпе-жек мәселесі алқыланған. Кездесу іріктеу кезеңі ретінде жоспарланған және қос боксшы үшін де маңызды қадам болуы тиіс еді. Алайда жекпе-жек өтпей қалды: Бойцов дайындыққа уақыттың аздығын алға тартып, кездесуден бас тартты.

Аңызға айналған боксшы өмірден озды: ол бірде-бір рет нокдаунға түспеген