Криштиану Роналду Әлем чемпионаты плей-офф кезеңіндегі жеңісін қаза тапқан әріптесіне арнады

Футболдан Португалия құрамасының жұлдызы Криштиану Роналду 1/16 финалда Хорватияны жеңгеннен кейін Диогу Жота туралы пікір білдірді. Португалия командасының бұрынғы ойыншысы осыдан бір жыл бұрын қайғылы жағдайда қаза тапқан болатын, деп хабарлайды Tengri Sport.

Хорватия құрамасымен өткен матч Роналду командасы үшін камбэкпен аяқталды, ал Криштиануның өзі пенальтиден гол соқты.

Ойыннан кейін бүкіл команда алаңда қалып, Диогу Жотаның жейдесімен суретке түсті, ал команда капитаны әлеуметтік желіде тебіреністі жазба қалдырды.

"Біз сіздер үшін жеңіске жеттік, Диогу және Португалия! Алға!" – деді ол.

Айта кетейік, Португалия – Хорватия матчі еуропалық уақыт бойынша 3 шілдеде өтті. Тура бір жыл бұрын "Ливерпуль" және Португалия құрамасының ойыншысы Диогу Жотаның ағасымен бірге сұмдық жол апатынан қаза тапқаны туралы хабар әлемді дүр сілкіндірген еді.

Қайғылы оқиғадан кейін Криштиану Роналду футболшының отбасына жария түрде қолдау көрсетті.

Диогу Жотаға не болды?

Еске сала кетейік, 2025 жылдың 3 шілдесінде Испания жолдарының бірінде ойыншының қатысуымен жол апаты болғаны белгілі болды.

28 жастағы шабуылшы ағасы Андремен бірге бір көлікте болған. Көлік тасжолдан шығып кеткен. Куәгерлердің айтуынша, жол-көлік оқиғасынан кейін көлік отқа оранған.

Кейінірек Азаматтық гвардия сарапшылары көліктің рұқсат етілген жылдамдықтан асып кеткенін мәлімдеді, бірақ бұл пікірмен куәгерлер келіспеді.

Сонымен қатар қайғылы оқиғадан небәрі екі апта бұрын футболшы үйлену тойын өткізген болатын.

Португалия 2026 жылғы Әлем чемпионатында

Португалия құрамасына келетін болсақ, команда турнирді Конго ДР командасымен 1:1 есебімен тең түсіп, қиын бастады. Содан кейін олар Өзбекстан құрамасын ойсырата жеңді (5:0), ал соңғы турда тағы да тең түсті – бұл жолы Колумбиямен. Нәтижесінде топта екінші орын алды.

1/8 финалда Хорватияны жеңгеннен кейін Португалияны мундиалдың басты фавориттерінің бірі – испандықтармен матч күтіп тұр.