Ламин Ямаль футбол тарихындағы ең қымбат ойыншы атанды

Испания құрамасы мен каталониялық "Барселонаның" жұлдызды вингері Ламин Ямаль футбол тарихындағы ең қымбат футболшы атанды, деп хабарлайды Tengri Sport.

Халықаралық спорттық зерттеулер орталығы (CIES) өзінің статистикалық моделіне негізделіп есептелген, әлемдегі трансферлік құны ең жоғары ойыншылардың тізімін ұсынды.

Бұл тізімде "Барселонаның" испаниялық вингері Ламин Ямаль көш бастады.

CIES нұсқасы бойынша оның трансферлік құны 358 миллион еуроны (203 миллиард теңге) құрайды, бұл - спорт тарихындағы ең жоғары көрсеткіш.

Одан кейінгі орынға қазіргі заманның үздік шабуылшыларының бірі, "Манчестер Ситидің" норвегиялық ойыншысы Эрлинг Холанд жайғасты, ол 227 миллион еуроға (128,7 миллиард теңге) бағаланды.

Ең қымбат ойыншылардың үздік үштігін "Реал Мадрид" ойыншысы, француз шабуылшысы Килиан Мбаппе түйіндеді. Дереккөз оны 166 миллион еуроға (94 миллиард теңге) бағалап отыр.

Айта кетейік, басты статистикалық футбол порталы Transfermarkt-тың мәліметінше, үш футболшының да бағасы өзгермеген және 200 миллион еуроны (113,4 миллиард теңге) құрайды.

Скриншот: transfermarkt.world

Футбол тарихындағы ең қымбат трансфер

Еске сала кетейік, футбол тарихындағы ең қымбат ойыншы – Бразилия құрамасы мен "Сантостың" жұлдызы Неймар. 2017 жылдың тамызында француздық ПСЖ 25 жастағы бразилиялық шабуылшы үшін каталониялық "Барселонаға" 222 миллион еуро төлеген болатын. Бұл трансфер әлі күнге дейін абсолютті рекорд болып қала бермек.