Макгрегор Нурмагомедовпен төбелестен кейін Двалишвилидің досын қуантты

Фото: instagram.com/thenotoriousmma; Бейнежазбадан кадрлар

Грузиялық балуан әрі UFC-дің экс-чемпионы Мераб Двалишвилидің досы Саба Лазишвили Усман Нурмагомедов және оның командасымен болған даулы төбелестен кейін ММА әлемінде үлкен танымалдылыққа ие болды, деп хабарлайды Tengri Sport.

Белгілі жүргізуші Нина-Мари Даниэльге (Нина Драма есімімен көбірек танымал) берген сұхбатында Саба Лазишвили қонақүйдегі оқиғадан кейін әлеуметтік желіде оған тіркелген ең танымал адам UFC аңызы, промоушеннің бұрынғы екі дүркін чемпионы Конор Макгрегор болғанын айтты.

- Саған тіркелгендер арасында ең танымалы кім?

- Конор Макгрегор. Соның арқасында мен ММА көре бастадым. Бұл керемет болған, маған оның жекпе-жектерін тамашалау қатты ұнайтын. Оны көргенде бойымды қуат кернейтін. Сонымен қатар Джервонта Дэвис. Бұл жігітті жақсы көремін. Ол мықты, - деді Лазишвили.

Ағайынды Нурмагомедовтердің Двалишвилиге жасаған шабуылы

Оқиға 2026 жылғы 11 қарашада Абу-Дабидегі (БАӘ) Hilton қонақүйі холында болған. Мераб Двалишвили өзінің күрес бәсекесі алдында RAF баспасөз қызметіне сұхбат беріп жатқан. Оның жанында жас грузин балуаны Саба Лазишвили болған.

Сол сәтте олардың артынан Усман Нурмагомедов бастаған топ келген. Усман Двалишвилиге бірдеңе айтып, бірден шапалақпен тартып жіберген. Осыдан кейін жаппай төбелес басталған.

Күзетшілер оларды ажыратпақ болғанымен, еденде жатқан грузиялық спортшыларды соғу мен тебу тоқтамаған. Кейін беті қан-жоса Мераб видео жариялап, қарсыластарының әрекетін балуандарға жат деп атады.

Instagram-дағы бұл жарияланымды көру

Merab Dvalishvili (@merab.dvalishvili) жарияланымы

Айта кетейік, видеода ағайынды Нурмагомедовтердің біреуі - Усман ғана көрінеді. Алайда кейін UFC-дің аса жеңіл салмақтағы бұрынғы чемпионы Алджамейн Стерлинг қақтығысқа Умар Нурмагомедов те қатысқанын айтты.

"Видеоға түспей қалған тағы бір жайт болды: Умар Нурмагомедов Мерабқа жақындап келіп, бетінен ұрды. Оның алдында ол сабырға шақырғысы келгендей сыңай танытқан. Ондай әрекеттен кейін адамды қалай сыйлауға болады? Егер Усман Мерабқа жалғыз келгенде, оған ешқандай кінә артпас едім.

Бірақ артындағы бір топ досымен келіп бұлай істеу - айуандық әрекет. Сонымен қатар маған видеоға түспей қалған сәтте Сабаның қолын қайырып, басынан тепкенін айтты. Меніңше, бұл - адам өлтіруге оқталу", - деді Стерлинг.

Кейін Әбу-Даби полициясы төбелеске қатысушыларды ұстады. Сот Усман Нурмагомедов пен оның бірқатар серігін алты айға бас бостандығынан айыруға, ірі көлемде айыппұл төлеуге және кейін елден шығаруға үкім кесті.

Алайда Хабиб Нурмагомедов БАӘ астанасына барғаннан кейін спортшылар қамаудан босатылып, алғашқы жаза жеңілдетілді: енді қамауға алынған 8 адамның әрқайсысы 150 мың дирхам (шамамен 18 миллион теңге) айыппұл төлеуі тиіс. Тараптар бір-біріне талап қоюдан бас тартты.

Бұл оқиға грузиялық балуан Саба Лазишвилиге бұрын-соңды болмаған танымалдылық әкелді. Қазір оның Instagram парақшасына 1,1 миллионнан аса адам тіркелген, бұл көрсеткіш әлі де өсіп жатыр.

Конор Макгрегор мен Джервонта Дэвистен бөлек, Лазишвилиге басқа да танымал спортшылар, мысалы, бокстан әлем чемпионы Александр Усик, UFC файтерлері Хамзат Чимаев, Илия Топурия, Алджамейн Стерлинг және басқа да адамдар тіркелді.

Instagram-дағы бұл жарияланымды көру

Real American Freestyle (@rafwrestlingusa) жарияланымы

Хабиб 200 миллион доллар үшін ММА-ға оралуы мүмкін бе? Файтердің өзі жауап берді

Пікірлер