Лионель Месси MLS-тің ең қымбат ойыншысы мәртебесін сақтап қалды. Лига ойыншылары қауымдастығы мәліметінше, оның кепілдендірілген төлемдері 28,33 миллион доллар (12,7 миллиард теңге) болады. Бір жыл бұрын бұл сома 20,45 миллион (9,2 миллиард теңге) болған еді.
Лионель Месси MLS-тегі ең жоғары жалақы алатын ойыншы болып қала береді, сонымен қатар кемінде 10 миллион доллар табыс табатын ойыншылар саны беске дейін өсті 👀 https://t.co/Smz1etFGNv
— ESPN FC (@ESPNFC) 19 қараша, 2026 жыл
Айта кетейік, бұл сома футболшының алаңдағы ойыны үшін алатын ақысын ғана қамтиды. 2025 жылы қазанда аргентиналық шабуылшы клубпен келісімшартын 2028 жылғы маусымның аяғына дейін ұзартты. "Интер Майами" клубының иесі Хорхе Мас наурызда Месси барлық табысын есептегенде, жылына 70-80 миллион доллар (31,6-36 миллиард теңге) табатынын айтқан болатын.
Мансабын аяқтағаннан кейін футболшы клубтың үлесіне ие болады деген болжам да бар.
Лионель Месси "Интер Майами" клубынан жалақысын, иелік үлестерін және франшизадан түсетін басқа да табыс түрлерін қосқанда жылына 70 миллионнан 80 миллион долларға дейін табыс табады, деп хабарлады клубтың тең иесі Хорхе Мас Bloomberg агенттігіне. Месси өткен маусымда "Интер Майамиді" алғашқы MLS Кубогындағы жеңісіне бастап барды. https://t.co/SgEdqO4lJk
— Yahoo Sports (@YahooSports) 8 наурыз, 2026 жыл
Месси - "Интер Майами" жұлдызы
Лионель Месси "Интер Майамиге" 2023 жылы шілдеде француздың ПСЖ клубынан еркін агент ретінде ауысып келді. Ол келген алғашқы айлардан бастап-ақ клубты және бүкіл Солтүстік Америка футболын түбегейлі өзгертті.
Аргентиналық футболшы алғашқы маусымында-ақ командасына тарихи жеңіс сыйлады. "Интер Майами" 2023 жылы Leagues Cup турнирінде алғаш рет чемпион атанды. Ал 2024 жылы клуб MLS тұрақты чемпионатында ұпай саны бойынша рекорд орнатып, "Жанкүйерлер қалқанын" иеленді. Сол жылы Месси алғаш рет MLS маусымының ең үздік ойыншысы (MVP) атанды.
Нағыз триумф 2025 жылы болды: "Интер Майами" Шығыс конференциясын жеңіп алып, клуб тарихында тұңғыш рет MLS Cup чемпионы атанды. Месси сол маусымда "Алтын бутсы" (29 гол) марапатын иеленді.
2026 жылы 39 жастағы капитан екінші жыл қатарынан тұрақты чемпионаттың үздік сұрмергені (26 гол) атанып, команда Шығыс конференциясында екінші орын алуына көмектесті. Сондай-ақ, аргентиналық футболшы клубпен бірге Campeones Cup турнирінде жеңіске жетті.
Месси 2030 жылғы әлем чемпионатына оралуы мүмкін бе? Аргентина құрамасының бапкері пікір білдірді