Мысыр Әлем чемпионатында камбэк жасады

2026 жылғы футболдан әлем чемпионатының G тобындағы 2-тур аясында Жаңа Зеландия мен Мысыр құрамалары арасындағы матч аяқталды. Кездесуде 3:1 есебімен Мысыр жеңіске жетті, деп хабарлайды Tengri Sport.

Ойын барысы

Бірінші таймдағы жалғыз голды Жаңа Зеландия құрамасы соқты, оның авторы - Финн Сёрман.

Екінші таймның 59-минутында Мысыр есепті теңестірді: қарсылас қақпасына Мостафа Зико гол соқты. 67-минутта Мохамед Салахтың голының арқасында мысырлықтар алға шықты. Ал 82-минутта Мысыр басымдығын нығайта түсті: үшінші голды Трезеге соқты, оған Салах нәтижелі пас шығарды.

Ойын Ванкувердегі (Канада) "Би-Си Плэйс" стадионында өтті.

Турнирдің топтық кезеңі 11-27 маусым аралығында өтеді. Әр команда топтағы қарсыластарымен бір ойыннан өткізеді. Плей-офф кезеңіне әр топтан ең үздік екі құрама, сондай-ақ үшінші орын алған сегіз команда жолдама алады.

Бұған дейін Бельгия құрамасы G тобының екінші турында Иран командасымен тең ойнаған болатын. Ал Испания футболшылары Н тобының екінші турында Сауд Арабиясын ойсырата жеңді.