Неймар ӘЧ-2026-дағы сәтсіздіктен кейін Бразилия құрамасына қатысты шешімін айтты

Фото: DURAOFOTO/depositphotos.com

Бразилия құрамасы тарихындағы ең үздік сұрмерген әрі "Сантос" шабуылшысы Неймар ұлттық командадағы жолы аяқталғанын мәлімдеді, - деп хабарлайды Tengri Sport тілшісі TNT Sport-қа сілтеме жасап.

Футболшы бұл туралы "Сантос" Оңтүстік Америка кубогының 1/16 финалында венесуэлалық УСВ командасын жеңгенінен кейін айтты.

"Бразилия құрамасындағы оқиғам аяқталды деп ойлаймын. Мен барымды бердім. Бүкіл жүрегім мен өмірімді арнадым, бірақ бұдан былай бұны жалғастырғым келмейтініне сенімдімін", - деді ол журналистерге.

Осылайша, Неймардың Бразилия сапындағы соңғы матчі Әлем чемпионатының 1/8 финалындағы норвегиялықтарға қарсы ойын болды.

Бұл кездесуде бразилиялықтар екі гол өткізіп алды, ал Неймар қосымша уақытта пенальтиді сәтті орындады.

Бұл нәтиже бразилиялықтар үшін 1990 жылдан бергі ең нашар көрсеткіш болды, ол жылы да команда 1/8 финалда жарыс жолынан шығып қалған болатын.

НЕЙМАР 2030 ЖЫЛҒЫ ӘЛЕМ КУБОГЫНДА ОЙНАМАЙДЫ! 🇧🇷❌ Жұлдызды футболшы сұхбатында құрамадағы кезеңі аяқталғанын және бұдан былай "сары жейдені" кимейтінін айтты. #SeleçãoBrasileiro #FBR pic.twitter.com/ScqEXPe5UI
— TNT Sports BR (@TNTSportsBR) July 29, 2026

Неймар - бразилиялық футбол аңызы

34 жастағы шабуылшы ұлттық құрама сапында 2010 жылы дебют жасап, содан бері 130 матч өткізді.

Ол команда үшін 80 гол соғып, құрама тарихындағы ең үздік сұрмерген атанды. Ол 77 гол салған Пелені басып озды.

Сонымен қатар, Неймар ұлттық құрама сапында өткізген матчтер саны бойынша да рекорд орнатуы мүмкін еді, бірақ аңызға айналған Кафудың рекорды (143 матч) жаңартылмаған күйі қалатын секілді.