“Ол сенуден қалды“: Роналдудың Португалия құрамасына қатысты шешімі белгілі болды

Фото: vitaliivitleo/depositphotos.com

Португалия құрамасы мен Сауд Арабиясының "әл-Наср" клубының жұлдызы Криштиану Роналду басы дауға қалған соң ұлттық командаға оралмау туралы шешім қабылдады, деп хабарлайды Tengri Sport журналист Руи Сантошқа сілтеме жасап.

Инсайдтарымен танымал португалиялық журналист телеарналардың біріне берген сұхбатында Роналду бапкер Жорже Жезуш жұмысын жалғастырып жатқанда Португалия құрамасына қайтып келмейтінін мәлімдеді.

"Роналду бұл оқиғаның қалай өрбіп жатқанына мүлдем көңілі толмайды, әрине, мұнда президент Педру Проэнса туралы да сөз болып отыр. Оның әсіресе құраманың бас бапкері Жорже Жезуштың сөздеріне ашуы келді.

Өйткені Роналдудың ұстанымы бойынша, бұл жағдай жеңілдетілуі тиіс еді. Егер федерация президенті мен ұлттық құраманың бас бапкері Криштиану Роналдуды кері қабылдауға дайын екендерін айтса, ал Жорже Жезуш Роналду алдағы тізімге ілігуі мүмкін десе, футболшының пікірінше, егер олар бұның шынымен орындалғанын қаласа, айтылмауы тиіс кейбір сөздер болды.

Осылайша, басты мәселе - Роналду кейбір мәлімдемелерді мүлде зиянсыз деп санамайды. Ол бір-біріне қайшы келетін мәлімдемелерге сенуден қалды: бір жағынан Криштиану Роналдуды Ұлттар лигасында ойнауы үшін ұлттық құрамаға қайтару ниеті айтылса, екінші жағынан - "Мен ешкімнен кешірім сұрамаймын, мен бұл жерде кешірім сұрау үшін жүрген жоқпын. Құрамды мен жасаймын" деген сияқты сөздер айтылады", - деді журналист.

Айта кетейік, Криштиану Ұлттар лигасы матчтеріне дайындық кезінде ұлттық құрама лагерінен кетіп қалғаннан кейін, Португалия футбол федерациясы Роналдуға айыппұл салып, бір айлық шеттету туралы жариялаған болатын. Бұл мерзім құраманың келесі ойындарына дейін аяқталады.

Роналдуға қатысты дау: не болды?

Еске салайық, 27 қыркүйекте Норвегияға қарсы матч кезінде Португалия құрамасының бапкері Жорже Жезуш Криштиануды қосалқы құрамда қалдырып, екінші таймда жаттығуға жібергенімен, алаңға шығарған жоқ.

Даниялықтарға қарсы келесі кездесу алдында өткен баспасөз мәслихатында бапкер Роналду келесі матч құрамына да енбегенін хабарлады. Бұдан кейін Криштиану құрама лагерінен кетіп қалып, мұндай әрекетінің себебін түсіндірген жазба жариялады.

Instagram-дағы бұл жарияланымды көру

Cristiano Ronaldo (@cristiano) жарияланымы

Команда Роналдусыз үш матчтің үшеуінде де жеңіске жетті, ал бапкер аңызға айналған шабуылшыдан кешірім сұрамайтынын айтты.

Бұл ретте Криштиану бапкермен Норвегияға қарсы матчтегі жағдай туралы журналистерге пікір білдіру және оның футбол тарихындағы ерекше мәртебесін атап өту туралы келісім болғанын айтады.