“Олар Криштиануды бағаламайды“: Роналдудың анасы жанжалдан кейін ұлына араша түсті

Анасының пайымдауынша, португалиялықтар ұлының футболға қосқан үлесін тиісті деңгейде бағаламай отыр.

"Ол Португалия үшін көп еңбек сіңірді және әрдайым жанынан табылды. Ол әрқашан Португалияның қаһарманы болды. Оны лайықты деңгейде бағаламайды. Криштиануды қадірлемей жүр. Ол - бізде бар бірегей португалиялық", - деді ол Португалия телеарнасына берген сұхбатында.

Бұдан бөлек, ол Криштиануды ұлттық құрамадан кетпеуге көндіруге тырысқанын айтты.

"Мен оған сабыр сақтауды айттым, бірақ ол бәрібір осылай жасауды жөн көрді. Көре жатармыз. Мен оны барынша қолдадым, бірақ одан ештеңе шықпады", - деп басылым Мария Долорестің сөзін келтіреді.

Криштиану Роналду мен құрама арасындағы жанжал

Еске сала кетейік, 1 қазанда Ұлттар лигасы аясындағы Португалия мен Дания матчі қарсаңында Роналду құрама лагерінен кетіп қалған болатын. Бұл оқиға бапкер Жорже Жезуш баспасөз мәслихатында Криштианудың келесі ойынның құрамына кірмейтінін мәлімдегеннен кейін болды.

Біраз уақыттан кейін Роналду құрамадан кетуінің себебін ашып айтты. Оның сөзінше, бапкер берген уәдесінде тұрмаған және оны алаңға шығару ниеті болмаса да, жаттығу жасауға мәжбүрлеген.

Кейінірек Жезуш журналистердің сұрақтарына жауап бере отырып, Роналду үшін құрама есігі әрқашан ашық екенін, бірақ ойыншыдан кешірім сұраудың қажеті жоқ деп санайтынын айтты.

Айта кетейік, Криштианусыз команда Ұлттар лигасындағы барлық үш матчте жеңіске жетіп, топта көш бастап тұр.

Криштиану Роналду Португалия құрамасындағы жанжалдан кейін кешірім сұрады