+7 (777) 001 44
99
41 жастағы футбол жұлдызы құрама бапкері Жорже Жезуштың берген уәдесінде тұрмағанын мәлімдеді. Соның салдарынан Криштиану Ұлттар лигасы циклінің ортасында құрамадан кетіп қалған.
Роналдудың айтуынша, Жезуш бастапқыда оған циклдің бірінші және соңғы матчінде ойнауға мүмкіндік беруге келіскен. Бірақ кейін Норвегиямен өткен екінші ойында одан 30 минутқа алаңға шығуын өтініп, соңында бәрібір ойнатпай қойған.
Осыдан кейін Криштиану мен бапкер сөйлесіп, тәлімгердің баспасөз алдында болған жайтты түсіндіруі керектігі туралы шешімге келген. Роналду бапкердің даниялықтармен кездесу алдында журналистерге айтатын мәлімдеме мәтінін онымен алдын ала келіскенін айтты.
"Мен Пеле немесе Марадона деңгейіндегі тұлғаны бой қыздыруға мәжбүрлеп, содан кейін алаңға шығармай қателік жасадым. Егер бұл бүгін болса, бұлай істемес едім. Бұл мәселеге нүкте қою үшін: Криштианудың ұлттық құрамада болғанын қалаймын. Шын мәнінде, мен оны командада көргім келіп қана қоймайды, бұны өте қатты қалаймын. Бақытымызға орай, ол да маған сенеді. Ол маған "Әл-Насрда" сенді, мұнда да сенеді", - делінген Роналду жариялаған тармақтардың бірінде.
Футболшының айтуынша, дәл бапкердің уәдесін бұзуы оның командадан кетуіне түрткі болған.
"Кезекті орындалмаған уәдені күтпей-ақ, құрама лагерін тастап кетуді жөн көрдім. Мен үшін адамдар арасындағы қарым-қатынаста шындық әлі де ең маңызды құндылық болып қала береді. Қаншалықты ауыр болса да, маған шындықты айтыңыздар.
Шын мәнінде, сол баспасөз мәслихаты болатын күні таңертең федерация президентімен және бас бапкермен болған әңгімеде (олар мұны растай алатынына сенімдімін), егер олар мені құрамадан көргісі келмесе, бұл туралы ашық айтуы керектігін тағы да қайталадым.
Олар менімен тек ашық болуы керек еді. Мен оны қабылдар едім әрі ешкім ренжімейтіндей етіп, өзім армандағандай керемет бір нәрсе әзірлейтінімізге уәде бердім. Бұл қазіргідей есімде. Олар бір ауыздан "жоқ" деп жауап берді. Менің орным ұлттық құрамада екенін айтты", - деді Роналду.
Роналду және құрама: бұдан әрі не болады?
Сол жазбасында Роналду Норвегиямен өткен матчтен кейін жанкүйерлерге сәлем бермегені үшін кешірім сұрады. Бұл ойында оны алаңға шығаруға уәде бергенімен, қосалқы құрамда қалдырған болатын.
"Матч аяқталғанда, мен тек бәрі тезірек жеңіспен аяқталуын және мені жайыма қалдыруын қаладым. Мен жанкүйерлерге барып сәлем бермедім. Бұл тек менің жауапкершілігімдегі және болмауы тиіс қателік еді. Мені сол жерде қолдаған португалиялықтардан, барлық жанкүйерден және португал болмаса да, мені көру үшін келгендерден, көңілі қалған жандардан кешірім сұраймын", - деді ол.
Сонымен қатар Криштиану құрамадағы мансабы әлі аяқталмағанын және командаға көмектесуге дайын екенін баса айтты.
"Мен барлық жанкүйеріме, әсіресе португал халқына бір немесе бірнеше қоштасу матчі болатынына уәде бере аламын, оның өз уақыты келеді. Бірақ мен ұлттық құрама туралы ойлағанда, менің шын мәніндегі ойым - тек бәсекелестік пен күрес. Әкем қайтыс болғаны туралы суық хабарды естіген күні де осыны ойлаған едім. Мен ұлттық құрама лагерінде болдым және келесі күнгі матчтің соңына дейін сонда қалуды ұйғардым.
Мен өз елім үшін ешбір клуб үшін жасамайтын дүниені жасадым. Сондықтан, егер мен өз клубымда ойнап, гол соғып, физикалық тұрғыдан сау болсам және кез келген дисквалификация мерзімін өтеп болғаннан кейін, ұлттық құрамамыз үшін күресіп, жеңіске жетуге бүгінгі күнге дейінгідей әрқашан дайын боламын", - деп атап өтті Роналду.
Instagram-дағы бұл жарияланымды көру
Роналдудың ұлттық құрамадағы мансабы
Криштиану Роналду ұлттық құрама сапында 234 матч өткізіп, 146 гол соқты. Бұл - команда тарихындағы рекорд көрсеткіштер.
Роналдумен бірге құрама 2016 жылғы Еуропа чемпионатын жеңіп алды, сондай-ақ екі рет Ұлттар лигасында үздік атанды. Криштиану келгенге дейін Португалия командасында бірде-бір трофей болмаған.
Сонымен қатар соңғы әлем чемпионатында Роналду құрамадағы ойыны үшін сынға ұшырады. Команда 1/8 финалға дейін жетіп, болашақ чемпиондар – испандардан жеңіліп қалды. Ол турнирдегі бес ойында 3 гол соқты.
Instagram-дағы бұл жарияланымды көру
Роналдудың құрамадан кетуіне қатысты дау
Кейбір португалиялық БАҚ Криштианудың ұлттық құрамадан өз еркімен кеткенінен кейін оның командадағы мансабы аяқталды деп мәлімдеген болатын. Бұл жағдай 1 қазанда, Данияға қарсы матч қарсаңында, Жезуш баспасөз мәслихатында сөз сөйлегеннен кейін болды.
Кейінірек Жезуш журналистердің сұрақтарына жауап бере отырып, Роналду үшін құрама есігі әрқашан ашық екенін, бірақ ойыншыдан кешірім сұраудың қажеті жоқ деп санайтынын айтты.
Айта кетейік, Криштианусыз команда Ұлттар лигасындағы барлық үш матчте жеңіске жетіп, топта көш бастап тұр.
Британдық журналист Пирс Морган кейінірек бапкердің бұл әрекетін Роналдуды әдейі төмендетіп, масқаралау әрекеті деп бағалауға болатынын айтты..
