“Өзін француз санайды“: Испанияның бұрынғы премьер-министріне қатысты жаңа дау шықты

Экс-премьер 2026 жылғы Әлем чемпионатында Испания - Франция жартылай финалдық жұбы анықталғаннан кейін испаниялық басылымдардың бірінде авторлық бағанасын жариялады.

Рахой испандардың финалға шығатынына сенімді, уәж ретінде қарсылас командада Франция тумаларының жоқтығын алға тартты.

"Олар осы Әлем чемпионатындағы барлық матчтерінде жеңіске жетті және қазіргі уақытта ФИФА рейтингінде бірінші орында тұр. Сондай-ақ олардың құрамы өте жоғары деңгейде. Дегенмен, олардың сапында бірде-бір француз ойыншысы жоқ", - деп жазды ол.

Бұл мәлімдеме Францияда да, Испанияда да қатты сынға ұшырады. Испанияның қазіргі премьер-министрі Педро Санчес бәрінен де қатаң пікір білдіріп, ізашарын ксенофобия үшін айыптады.

"Елге тиесілілікті әлі күнге дейін тегіне, туған жеріне немесе терісінің түсіне қарай анықтайтын адамдар бар. Ал басқалары оны осы елдегі түп-тамырымызға және футбол ойнау, қарттарымызға қамқорлық жасау немесе кәсіп ашу арқылы ел дамуына үлес қосуға деген ұмтылысымызға қарай бағалайды. Испания оны жақсы көретіндерге және оның игілігі үшін еңбек ететіндерге тиесілі. Ксенофобиялық мәлімдемелерімен елдің абыройына нұқсан келтіретіндерге емес", - деп жазды ол X желісінде.

Францияның Испаниядағы елшілігі экс-премьердің сөзі шындыққа жанаспайтынын атап өтіп, ресми жауап қайтарды.

"Пікірталасқа түсу ниетіміз жоқ, тек фактілерді еске саламыз: Франция құрамасының барлық ойыншысы - француз. 26 ойыншының 23-і Францияда туған. Шетелде дүниеге келген үшеуі де француз азаматтары", — деп жазды ресми аккаунт.

ӘЧ-2026 кезіндегі Килиан Мбаппеге қатысты дау

Айта кетейік, Франция құрамасына қатысты бұл жаңа айыптау Парагвай сенаторы команда капитаны Килиан Мбаппе туралы даулы мәлімдемесі аясында туындап отыр.

Сенатор Селеста Амарилья футболшыны "өзін француз санайтын отарланған камерундық" деп атады. Жауап ретінде Мбаппе оны Парагвай туралы жағымсыз әсер қалдырып отырған "жексұрын әйел" деп атады.

Амарильяға қатысты тергеу басталды, ал оның өзі Мбаппені сотқа беретінін мәлімдеді.

Дауға Әлем чемпионатының 1/8 финалындағы Парагвай мен Франция құрамаларының кездесуі түрткі болды, бұл матчте жалғыз голды Килиан пенальтиден соққан еді.

Франция - Испания: ӘЧ жартылай финалы

Еске сала кетейік, 15 шілдеге қараған түні Испания мен Франция құрамалары футболдан Әлем чемпионатының алғашқы финалисін анықтайды.

Сарапшылардың пікірінше, француздар турнирдің басты фавориті.

“Өзін француз санайды“: Мбаппені қорлаған сенатор бас бостандығынан айрылып, қомақты айыппұл төлеуі мүмкін