“Реалда“ көшбасшылар арасындағы жанжалдан кейін Винисиусқа қатысты шешім қабылданды

Испания чемпионатындағы "Барселонаға" қарсы матчте мадридтік "Реалдың" капитаны Винисиус Жуниор болады. Клуб мұндай шешімді Федерико Вальверде мен Орельен Тчуамени арасындағы жанжалдан кейін қабылдады, - деп хабарлайды Tengri Sport.

Бразилиялық форвард "Барселонаға" қарсы маңызды матчте команданы алғаш рет капитандық таңғышпен бастап шығады. "Реалдың" негізгі капитаны мен вице-капитаны бұл кездесуге қатыспайды.

Еске сала кетейік, "Реалдың" ресми капитаны — Дани Карвахаль, алайда испаниялық қорғаушы биылғы маусымда бұлшықет жарақатынан ұзақ уақыт емделген болатын. Ал алдыңғы "Эспаньолға" қарсы ойында сүйегі шытынап, белгісіз мерзімге саптан шығып қалды.

Биылғы маусымдағы көптеген ойындарда команданы алаңға бастап шыққан вице-капитан — Федерико Вальверде. Уругвайлық ойыншы жаттығу кезінде Тчуаменимен болған жанжалдан алған жарақатына байланысты алдағы "Барселонамен" өтетін кездесуді өткізіп алады.

Винисиус капитандық таңғышқа кезектен тыс ие болды, егер оның жағдайы жақсы болса, Эль-Класикода команданы дәл соның бастап шығатыны анық.

Вальвердемен не болды: толық мәліметтер

"Реалдың" жартылай қорғаушысы Орельен Тчуамени сәрсенбі күнгі жаттығулардың бірінде команда капитанымен сөзге келіп қалса, бейсенбіде олардың арасындағы жанжал жалғасқан. Нәтижесінде Вальверде дене жарақатымен ауруханаға түсті.

Вальверденің айтуынша, командаласы екеуінің арасында төбелес болмаған, ол жай ғана "үстелге соғылып қалған". Соған қарамастан клуб басшылығы бұл жанжалға қатысты тәртіптік тергеу жүріп жатқанын және медициналық қорытынды бойынша Федерико алдағы екі аптаны өткізіп алатынын мәлімдеді.

"Реал" жұлдыздары жаттығу кезінде төбелес шығарды: тергеу басталды

Винисиус бұған дейін де капитан болған: ол матчтердің бірін Қазақстанда өткізді

Винисиус Жуниор үшін команданы алаңға капитан ретінде бастап шығу - таңсық емес. Бразилиялық шабуылшы алғаш рет бұл рөлді 2025 жылдың ақпанында атқарды, сол кезде команда Испания Кубогының жартылай финалында "Реал Сосьедадты" жеңген болатын.

Шабуылшы Чемпиондар лигасының матчтерінде де капитан болды. Атап айтқанда, ол 2025 жылдың қыркүйегінде Алматыдағы "Орталық" стадионда дәл осы мәртебеде алаңға шықты.

Қазақстанда Винисиус алаңда 70 минут өткізіп, командасы 5:0 есебімен жеңіске жеткен болатын.

Фото: TengriNews.kz/Болат Айтмолда

"Реал" – "Барселона": принципті текетірес

"Барселона" – "Реал" матчі 11 мамырға қараған түні "Камп Ноу" стадионында өтеді. Бұл ойынның қос команда үшін тарихи маңызы зор, сонымен қатар биыл турнирлік кесте үшін де мәні өте жоғары.

Егер "Барселона" жеңіске жетсе, мерзімінен бұрын чемпиондығын ресми түрде рәсімдейді. Ал егер "Реал" жеңсе, мадридтік команда аралықты 8 ұпайға дейін қысқартып, көшбасшылық үшін таласты жалғастырады.