Титулынан айырылған Чимаевтың келесі қарсыласы белгілі болды

UFC-дің орта салмақтағы бұрынғы чемпионы Хамзат Чимаев RAF 10 турнирінде америкалық файтер Диллон Дэниске қарсы белдесу өткізеді, деп хабарлайды Tengri Sport.

Еркін күрестен америкалық RAF лигасы 13 маусымда Сент-Луисте (Миссури штаты, АҚШ) өтетін өзінің 10-шы мерейтойлық турнирін жариялады. Турнир аясында UFC-дің орта салмақтағы экс-чемпионы Хамзат Чимаев пен америкалық файтер Диллон Дэнис кездеседі.

Айта кетейік, аталған турнирде UFC-дің жеңіл салмақтағы үздік файтері Арман Царукян мен әлемнің ең мықты промоушенінің бұрынғы жұлдызы Тони Фергюсон да күш сынасады.

Сондай-ақ турнирге еркін күрестен Қазақстанның үздік өкілдерінің бірі, 92 келіге дейінгі салмақ дәрежесінде 2023 жылғы әлем чемпионы Ризабек Айтмұхан қатысады. Оның қарсыласы америкалық балуан Хейден Зиллмер болмақ.

Хамзат Чимаевтың сенсациялық жеңілісі

Еске сала кетейік, орта салмақтағы чемпиондық атақ үшін жекпе-жек 10 мамыр күні таңертең Ньюарк қаласындағы (Нью-Джерси штаты, АҚШ) аренада ұйымдастырылған UFC 328 турнирінде өтті. Жекпе-жек 5 раундтық толық дистанцияға созылып, төрешілердің шешімімен аяқталды.

Бірінші кезеңде Чимаев тез арада тейкдаун жасап, бүкіл бес минут бойы Стриклендті бақылауда ұстады. Алайда келесі раундтарда "Борз" көпшіліктің күткеніне қарамастан, күреске бармай, америкалықпен тік тұрып айқасты.

Бұл тіпті Стриклендтің өзін де таңғалдырды, ол жекпе-жек бойы аяққа өту мен партерге түсіруді күтіп, жекелеген соққылар бағыттап, қашықтықты сақтады. Бірақ көрермендер Чимаевтан партердегі басымдықты көре алмады, ал Стрикленд өз кезегінде оны тік тұрған қалыпта соққылармен басып түсіп, эпизодтарды өз пайдасына шешті. Нәтижесінде төрешілер оған жеңісті бөлек шешіммен берді.