WBO Әлімханұлының титулдық жекпе-жегі бойынша жаңа шешім қабылдады: не болып жатыр?

Фото © Tengrinews.kz / Тұрар Қазанғапов

Дүниежүзілік бокс ұйымының (WBO) басшысы Густаво Оливьери қазақстандық Жәнібек Әлімханұлы мен ұлыбританиялық әлем чемпионы Хамза Шираздың промоутерлері титулдық жекпе-жек өткізу туралы келісімге келе алмағанын мәлімдеді, деп хабарлайды Tengri Sport функционердің әлеуметтік желідегі парақшасына сілтеме жасап.

WBO басшысының мәлімдемесіне сәйкес, гонорарларды бөлу бойынша қорытынды тыңдау 16 қыркүйекте ұйымның Пуэрто-Рикодағы бас кеңсесінде өтеді.

"WBO ұйымы Queensberry Promotions және Top Rank промоутерлік компанияларынан тараптардың келіссөздер жүргізу үшін белгіленген мерзімде ортақ мәмілеге келе алмағаны туралы ресми растау алғанын хабарлаймыз. Осыған байланысты WBO-ның чемпиондық жекпе-жектер жөніндегі комитеті промоутерлік сауда-саттық процедурасын тағайындайды", - делінген Оливьеридің мәлімдемесінде.

Еске сала кетейік, бұған дейін WBO боксшылардың тараптарына келіссөздер үшін 20 күн уақыт беріп, кейін бұл мерзімді 10 қыркүйекке дейін ұзартқан болатын.

Айта кетейік, Әлімханұлының командасы бұған дейін бір рет промоутерлік сауда-саттыққа қатысып, жаңа зеландиялық титулға үміткер Андрей Михайловичпен жекпе-жек алдында жеңіліп қалған еді.

Нәтижесінде боксшылар арасындағы кездесу қарсыластың аумағында өтіп, қазақстандықтың гонорары 169 миллион теңгеге азайды.

Жәнібек Әлімханұлының Канело салмағындағы титул үшін жекпе-жегі: хронология

Еске салсақ, өткен жылдың соңына дейін Жәнібек Әлімханұлы орта салмақта WBO және IBF нұсқалары бойынша чемпион болған. 2025 жылдың желтоқсанында ол үшінші титул үшін жекпе-жек өткізуі тиіс еді, бірақ допинг қолданды деген айыптардан кейін оның айқасы тоқтатылып, қазақстандықтың өзі шеттетілді.

Көп ұзамай IBF Жәнібекті өз нұсқасы бойынша белбеуінен айырды, ал жазда қазақстандық WBO титулынан өз еркімен бас тартты. Бұл атақты мексикалық Сауль "Канело" Альварес пен басқа да танымал боксшылар өнер көрсететін екінші орта салмаққа ауысу үшін жасалды.

Instagram-дағы бұл жарияланымды көру

JANIBEK | QAZAQ STYLE (@janibek_alimkhanuly) жарияланымы

Осыдан кейін WBO Жәнібекті екінші орта салмақ рейтингінде бірінші орынға қойып, Әлімханұлын белбеуге міндетті үміткер деп жариялады. Титул иегері – бұған дейін басқа санатта қазақстандықпен жекпе-жектен қашқан британдық Хамза Шираз ұйымның бұл шешімін қателік деп санайды.

Оның сөздеріне қарамастан, 14 тамызда боксшылардың промоутерлік компаниялары арасында келіссөздердің басталғаны хабарланды.