Әлем кубогіндегі қазақстандық боксшылар: тікелей көрсетілім

Бокстан Қазақстан құрамасы Бразилияның Фос-ду-Игуасу қаласында өтіп жатқан Әлем кубогінің бірінші кезеңінде ширек финал жолдамасы үшін бақ сынайды, деп хабарлайды Tengri Sport.

Сәуірдің 24-не қараған түні бокстан Әлем кубогі бірінші кезеңінің төртінші жарыс күні өтеді.

Қазақстан құрамасының боксшылары турнирдің ширек финалына шығу үшін өнер көрсетеді.

Төртінші жарыс күні ұлттық құраманың барлығы 3 боксшысы шаршы алаңда қолғап түйістіреді: екеуі күндізгі сессияда, біреуі кешкі сессияда жекпе-жек өткізеді.

Қазақстан құрамасы жекпе-жектерінің кестесі

Күндізгі сессия

• 51 келіге дейін (әйелдер): Алуа Балқыбекова - Златислава Чуканова (Болгария), 1/8 финал, 4-жұп (В рингі);
• 65 келіге дейін: Хуго Грау (Франция), 1/8 финал, 11-жұп (А рингі).

Кешкі сессия

• 65 келіге дейін (әйелдер): Аида Әбікеева - Виктори Жилкова (Чехия), 1/8 финал, 5-жұп (А рингі).

Қазақстан құрамасы жекпе-жектерінің тікелей көрсетілімі

Бокстан Әлем кубогі кезеңіндегі жекпе-жектердің тікелей көрсетілімін Бразилия бокс федерациясының YouTube арнасынан тамашалауға болады.

Айта кетейік, күндізгі сессия Қазақстан уақытымен сағат 19:00-де, ал кешкі сессия сәуірдің 24-іне қараған түні сағат 01:00-де басталады.

Еске сала кетейік, үшінші жарыс күні де Қазақстан құрамасы ширек финалға жолдама алу үшін жекпе-жектер өткізген болатын.

70 келіге дейінгі салмақ дәрежесінде сынға түскен Фарух Тоқтасынов жапондық Сэвон Окадзаваны 3:2 есебімен (төрешілер шешімімен) жеңді.

60 келіге дейінгі салмақта өнер көрсететін Виктория Графеева Әзірбайжан спортшысы Эмили Рзаеваны нокаутқа түсірді.

50 келіге дейінгі салмақтағы Даниял Сабит мажарстандық Иштван Саканы айқын басымдықпен ұтып, ерік-жігерінің арқасында жеңіске жетті.

Ал 80 келіге дейінгі салмақ дәрежесіндегі Диас Молжігітов Аустралия боксшысы Марлон Севехонды 4:1 есебімен тізе бүктіріп, турнирдің ширек финалына өтті.

Естеріңізге сала кетейік, турнир 2026 жылдың 26 сәуіріне дейін жалғасады. Жарысқа Қазақстаннан бөлек 50-ден астам елден 400-ге жуық боксшы қатысады деп жоспарланған.

Айта кетейік, үшінші жарыс күнінің басты сенсациясы Қазақстанның ең атақты боксшысы Назым Қызайбайдың жеңілісі болды.