Асу Алмабаевты танымал файтер жекпе-жекке шақырды: қазақстандықтың жауабы белгілі болды

Фото: instagram.com/asu_zulfikar57; Видеодан кадрлар

UFC-дің америкалық файтері, титулдан бұрынғы үміткер Брэндон Ройвал промоушендегі Қазақстанның үздік спортшысы Асу Алмабаевты жекпе-жекке шақырды, - деп хабарлайды Tengri Sport.

Америкалық спортшы UFC 329 турнирінде ұлыбританиялық файтер Лонэ Кавананы қылқындыру әдісімен жеңгеннен кейін, қазақстандық Асу Алмабаевты октагонға шақырды. Ройвал "Зұлпықарға" құрмет көрсетіп, оны үздік деп атады және онымен күш сынасуға ниетті екенін білдірді.

"Асу Алмабаев, кеттік. Сен үздіксің, мықтысың. Мен сенімен төбелескім келеді, өйткені сен өте мықтысың, бауырым", - деді Ройвал жекпе-жектен кейін.

Instagram-дағы бұл жарияланымды көру

UFC on Paramount+ (@ufconparamount) жарияланымы

Tengri Sport тілшісі Асу Алмабаевтың бапкері Эдуард Базровқа хабарласты. Бапкер өз сұхбатында Асудың ешқашан шақырулардан бас тартпайтынын және америкалықпен кездесуге дайын екенін айтты.

"Былай айтайын, Асу ешқашан шақырудан да, жекпе-жектен де қашқан емес. Бұл біз үшін, біздің команда мен Асу үшін өте жақсы нұсқа. Бұл кездесу болады. Ол Каванамен өте жақсы жекпе-жек өткізді. Бұған дейін бұрынғы чемпион Мореноны жеңген жас әрі мықты жігітті тізе бүктірді.

Ол – күресі де, тынысы да, соққы техникасы мен футворкы (аяқпен жұмыс істеуі – ред. ескертпесі) да жақсы дамыған жан-жақты спортшы. Біз үшін бұл өте жақсы емтихан және титулға бір табан жақындауға мүмкіндік", - деді Базров Tengri Sport-қа берген сұхбатында.

Instagram-дағы бұл жарияланымды көру

Eduard Bazrov-тың жазбасы (@eduard_bazrov15)

Еске салайық, UFC 329 турниріндегі жекпе-жекте Брэндон Ройвал мен Лонэ Кавана бір-біріне есе жібермей, тең дәрежеде өнер көрсетті. Екінші раундта ұлыбританиялық спортшы америкалықты нокдаунға түсіріп алғанымен, Ройвал есін жиып, тік тұрып 2-раундты соңына дейін жеткізе алды.

Шешуші кезеңде америкалық Кавананы жерге құлатып, қылқындыру әдісіне салмақ болды. Ұлыбританиялық бұл қыспақтан шығып кеткенімен, арқасын беріп қойды. Ройвал бұл мүмкіндікті мүлт жібермей, артынан қылқындыру әдісін сәтті орындап, қарсыласын берілуге мәжбүр етті.

Осылайша, Брэндон Ройвал техникалық нокаутпен жеңіске жетті.

Лон, сен әлі ораласың ♥️ 🏴󠁧󠁢󠁥󠁮󠁧󠁿 #UFC329

Лонэ Кавана тартысты жекпе-жекте есе жіберді! pic.twitter.com/twUwWTDrgb
— UFC Europe (@UFCEurope) 12 шілде, 2026 жыл

Ал Асу Алмабаевқа келетін болсақ, ол соңғы рет 28 маусымға қараған түні Бакуде (Әзербайжан) өткен UFC Fight Night 280 турнирінде октагонға шыққан. Онда қазақстандық спортшы америкалық Чарльз Джонсонды мерзімінен бұрын жеңді.

Жекпе-жектің үшінші раундында Алмабаев қарсыласын партерге түсіріп, сирек кездесетін әдісті қолданды.

Бұл әдіс - UFC тарихындағы ең сирек қолданылатын тәсілдердің бірі. Промоушен тарихында бұл әдіс бұған дейін небәрі 3 рет жасалған болса, Асу оны 4-ші болып орындады.