Айбек Оралбай бокстан Әлем кубогінің ширек финалына шықты

90 келіден жоғары салмақ дәрежесінде өнер көрсететін қазақстандық боксшы Айбек Оралбай бокстан Әлем кубогі кезеңінің ширек финалына жолдама алды, деп хабарлайды Tengri Sport.

1/8 финалда отандасымыздың қарсыласы америкалық боксшы Ннажаи Врайт болды. Бірінші раунд бойы қазақстандық спортшы орта қашықтықта жұдырықтасуға тырысса, оның қарсыласы жақын қашықтықта шабуыл жасап, соққылар сериясын жаудырды.

Оралбайдың стратегиясы нәтижелі болып, төрешілер бірінші раундтағы жеңісті оған берді.

Екінші кезеңде қазақстандық боксшының өзі де жақын қашықтыққа ауысып, соққы бағыттай бастады. Оралбайдың қарсы шабуылдары да сәтті шықты. Америкалық спортшы корпустан ұруға тырысып, ұзақ соққылар сериясын жасады. Екінші раундта да төрешілер қазақстандыққа басымдық берді.

Үшінші раунд америкалықтың клинч жасауымен және арқан жанындағы ұзақ шабуылымен басталды. Алайда ринг шетінен алыстаған бойда Оралбай комбинациялық соққыларын дөп тигізді. Раунд ортасында Врайт жақын қашықтықтан жекелеген соққыларға басымдық берсе, қазақстандық спортшы қарсы шабуылдармен және мығым қорғаныспен жауап берді.

Жекпе-жек соңына дейін жалғасып, төрешілер шешімімен Айбек Оралбай бірауыздан жеңіске жетті.

Еске сала кетейік, бұған дейін рингке Қазақстан құрамасының тағы бір өкілі, 80 келіге дейінгі салмақта өнер көрсететін Сабыржан Аққалықов шыққан болатын. 1/16 финалда ол қытайлық Ван Сяобаомен кездесіп, оны 5:0 есебімен жеңді.

Сондай-ақ бүгін Айбектің туған ағасы, Париж (Франция) Олимпиадасының күміс жүлдегері Нұрбек Оралбай да жекпе-жек өткізді. 90 келіге дейінгі салмақ дәрежесінде ол Оңтүстік Корея өкілі Гичшае Киммен кездесті. Бәсеке екінші раундта қазақстандықтың мерзімінен бұрын жеңісімен аяқталды.

Еске сала кетейік, World Boxing ұйымдастырған бокстан Әлем кубогінің екінші кезеңі 15-21 маусым аралығында Гуйян қаласында (Қытай) өтеді. Жарысқа қатысатын Қазақстан құрамасы сапында 9 ер және 8 әйел боксшы бар.

Қазақстан бокстан Әлем кубогін жеңіспен бастады