Федерация Азиада мен Азия параойындарының жүлдегерлері мен жеңімпаздарына ақшалай сертификаттар табыс етті. Әсіресе, спорттық жүруден марафон қашықтығында жеңіске жетіп, бірақ тыйым салынған аяқ киімді пайдаланғаны үшін алтыннан айырылған Ясминаны ерекше атап өтуді жөн көрген.
"Кештің басты оқиғасы - марафон қашықтығында ерекше қайсарлық танытқан Ясмина Тоқсанбаеваға бір бөлмелі пәтердің кілтін табыстау болды. Пәтер федерация мен демеушілер атынан берілді. Федерация Ясминаны Азия ойындарының нағыз чемпионы және ел мақтанышы деп санайды. Бұл бағалы сыйлық спортшыға қосымша қолдау болып, алдағы Олимпиада ойындарына дайындық барысында жаңа серпін беретініне сенеміз", - деп мәлімдеді федерация өкілдері.
Тоқсанбаева неге Азиада алтынынан айырылды?
Еске сала кетейік, қазақстандық 21 жастағы бойжеткен спорттық жүрумен айналысады және бұған дейін 20 шақырым қашықтықта Азия чемпионатының күміс пен қола жүлдесін иеленген. Биылғы Азия ойындарында ол 42 шақырымдық марафонға қатысып, барлық қарсыласынан озып шыққан болатын.
Жарыс аяқталғаннан кейін Ясминаның чемпион атанбайтыны белгілі болды. Оның аяқ киімі регламентке сәйкес келмеген. Қазақстандық спортшы дисквалификацияланды.
ҚР ҰОК біздің сауалымызға берген жауабында спортшылардың аяқ киіміне қойылатын талаптар алдын ала жарияланғанын және Азиада басталуына бірнеше күн қалғанда жаттықтырушылар жиналысында қосымша түсіндірілгенін айтты.
Тоқсанбаеваның нәтижесі жойылғанына қарамастан, Жеңіл атлетика федерациясы оған сыйақыны толық көлемде төлейтінін мәлімдеді.
Қазақстан кроссовка үшін Азиада алтынынан айырылды: кім жауапқа тартылады?
Айта кетейік, Ясмина Тоқсанбаеваны Азиаданың басқа жеңімпаздарымен бірге Қазақстан Президенті Қасым-Жомарт Тоқаев қабылдады.