Азияда медалі үшін өткен Қазақстан - Өзбекстан жекпе-жегі суперкамбэкпен аяқталды

Фото: Қазақстан бокс федерациясы

75 келіге дейінгі салмақ дәрежесінде өнер көрсететін қазақстандық боксшы Наталья Богданова 2026 жылғы Азия ойындарының жартылай финалына жолдама алды, деп хабарлайды Tengri Sport.

Турнирдің ширек финалында қазақстандық спортшы өзбекстандық Азиза Зокировамен қолғап түйістірді.

Бірінші раунд бірқалыпты қарқында өтті. Қос боксшы да шабуыл үшін ыңғайлы қашықтық іздеп, бастаманы кезек-кезек қолға алуға тырысты, алайда Зокированың соққылары дөп тиіп, бұл раундта 5:0 есебімен басым түсті.

Екінші кезеңде Богданова бірінші нөмірмен белсенді жұмыс істей бастап, соққылар комбинациясымен қарсыласына жақындай түсті. Қазақстандық боксшы ашық айқасқа шығып, ауыр соққылар бағыттау арқылы қарсыласын клинчке жүгінуге мәжбүр етті. Екінші раундты Богданова 4:1 есебімен өз пайдасына шешті.

Үшінші раунд ең тартысты кезең болды. Богданова айқасқа түсуден қаймықпай, барынша көп ұпай жинауға тырысты. Қазақстандық спортшы ұзақ комбинациялар жасап, Зокированың соққыларынан қорғанып бақты.

Үш раундтың қорытындысы бойынша Наталья Богданова 4:1 есебімен жеңіске жетті.

Айта кетейік, жартылай финалға шығу Наталья Богдановаға 2026 жылғы Азия ойындарының қола жүлдесін қамтамасыз етті, өйткені турнир регламенті бойынша үшінші орын үшін жекпе-жек өткізілмейді.

Наталья Богданова - әлем чемпионы

Еске сала кетейік, 2025 жылы Солтүстік Қазақстан облысының тумасы екі бірдей әлем чемпионатына қатысқан болатын. Наурыз айында IBA нұсқасы бойынша өткен турнирде Наталья үшінші орынды иеленсе, күзде World Boxing турнирінде есе қайтарып, әлем чемпионы атанды.

Instagram-дағы бұл жарияланымды көру

World Boxing Events (@world.boxing.events) жарияланымы

Сондай-ақ 2025 жылы World Boxing халықаралық бокс федерациясы жанкүйерлердің дауыс беру қорытындысы бойынша қазақстандық Наталья Богданованы әйелдер арасындағы "Жылдың үздік боксшысы" деп танығанын айта кеткен жөн.

Instagram-дағы бұл жарияланымды көру

World Boxing Events (@world.boxing.events) жарияланымы

Еске салсақ, бұған дейін тағы бір қазақстандық, бокстан екі дүркін әлем чемпионы Алуа Балқыбекова да Азия ойындарының жартылай финалына өткен болатын. Ширек финалда ол жапониялық Юна Нишинаканы 3:2 есебімен ұтты.