Эр-Риядта (Сауд Арабиясы) өткен турнирде Родригеске қарсы кездесудің бірінші раундында-ақ қазақстандық спортшы қарсыласын сұрапыл соққымен нокдаунға түсірді. 10 раундқа жоспарланған жекпе-жек өте тез аяқталды.
Беделді The Ring және DAZN порталдары жекпе-жек аяқталған соң оны "жыл нокауты" деп атап үлгерді, бірақ Бектің өзі мұндай нәтижені көбіне сәттілікке балайды.
– Сіз бірінші раундта-ақ мексикалықты жеңіп, керемет нәтиже көрсеттіңіз. БАҚ мұны "жыл нокауты" деп жатыр. Сіз үшін дәл осылай жеңіске жету қаншалықты маңызды болды?
– Егер БАҚ солай айтса, демек оларға ұнағаны! Кәсіпқой бокста мұндай нәтижелер ескеріледі, өйткені бұл – бизнес. Сен жанкүйерлерге ұнауың керек, себебі олар осы эмоциялар үшін ақша төлейді. Мен үшін жеңіске жету маңызды болды, бірақ оның қалай болатынын алдын ала болжай алмадым.
Меніңше, бұл жай ғана сәттілік болды, өйткені Родригес – жақсы, тәжірибелі қарсылас, ол чемпиондық жекпе-жекке шыққан. Мен тіпті оның тәжірибесінен аздап қорықтым, себебі оның 10 раундтық кездесулері көп болған, ал мен үшін бұл бірінші рет еді, – деді Нұрмағанбет Tengri Sport-қа берген сұхбатында.
Рейтингте қалай көтерілуге және чемпион болуға болады?
Бек Нұрмағанбет 2019 жылы Азия чемпионатын жеңіп алды, бірақ кейін жарақат алып, Олимпиада ойындарының іріктеуіне қатыса алмады. Осыдан кейін ол кәсіпқой боксқа ауысу туралы шешім қабылдап, 2020 жылдан бері 17 жекпе-жек өткізді. Олардың бәрінде жеңіске жетіп, 15 кездесуді мерзімінен бұрын аяқтады.
Чемпиондық статистикаға қарамастан (мысалы, Әлімханұлында да 17-0), 28 жастағы Бек рейтингтерде чемпиондық белбеуден әлі алыс. Нұрмағанбеттің ең жоғары рейтингі IBF-те – 9-орын, ал WBC нұсқасы бойынша ол 14-орында тұр.
– Сізде қатарынан 17 жеңіс бар, бірақ әлемдік рейтингтерде әлі де титулдарға жақын емессіз. Әлем чемпионы болу үшін не істеу керек?
– Бұл 17-ші жекпе-жек болды. Қадам-қадаммен алға басамыз. Кәсіпқой бокста бәрі осылай жұмыс істейді. Бұл – мүлдем басқа сала. Айырмашылық өте үлкен. Осындай қызықты нокауттар, жарақаттар мен қан көбірек болуы үшін қолғаптар өте жұқа әрі жеңіл. Адамдарға бұл қызық. Чемпион болу үшін барлық жанкүйерге эмоция сыйлауың керек.
Белбеулерге келетін болсақ, маған мұндай деңгейге жету үшін рейтингте жоғары тұрған қарсыластарды жеңу керек, шеберлігі жоғары жігіттермен рингке шығып, олардан басым түсу қажет. Дәл осындай жеңістер арқылы ғана мен өз мақсатыма жете аламын, – деді ол.
Олимпиада ойындарына құрамаға оралу туралы
Нұрмағанбет алты жыл бұрын кәсіпқой боксқа ауысса да, өз арманын орындау және Олимпиадада өнер көрсету үшін құрамаға оралуы мүмкін еді. Кем дегенде, регламентте бұған ешқандай кедергі жоқ.
Кәсіпқой боксшылар АҚШ-тағы Олимпиадаға жіберілді: бұл Қазақстан үшін нені білдіреді?
Алайда Бек қазір кәсіпқой карьерасына баса назар аудару керек деп санайды.
– Қазіргі регламент бойынша Олимпиада алдында құрамаға қайта оралуға шектеу жоқ. Мұндай ниетіңіз бар ма, әсіресе Ойындардың сіз жекпе-жектеріңіздің көбін өткізген АҚШ-та өтетінін ескерсек?
– Қазір жоқ. Меніңше, кәсіпқой боксшыға әуесқой бокс аса қызық емес, – деп атап өтті ол.
"Канелоның осал тұсы жоқ"
Нұрмағанбет өз жекпе-жегін Канело – Мбилли андеркардында өткізді. Бұл кеште атақты мексикалық WBC нұсқасы бойынша чемпиондық белбеуін қайтарып алды. Қазақстандықтың бұл кардқа түсуі кездейсоқтық емес, өйткені ол 2023 жылдың жазынан бастап Канелоның бапкері Эдди Рейносоның командасына қосылып, Сауль Альвареспен бір залда жаттыға бастаған.
– Жеңістен кейін бапкер Эдди Рейносо сізді жылы құшақтады – бұл кадрлар БАҚ-та кеңінен тарады. Ол сізге не айтты және оның бұл жеңістегі рөлі қандай?
– Эдди – менің бапкерім әрі менеджерім. Ол мені үнемі қолдап отырады. Біз жақсы араласамыз.
– Әлімханұлының Канелоға тастаған үндеуі туралы не ойлайсыз? Мексикалықпен спарринг өткізу карьераңызға қаншалықты көмектеседі және қазір оның мүлдем осал тұстары бар ма?
– Жәнібек ағай – менің кумирім. Мен оның барлық арманы орындалуына шын жүректен тілекшімін. Ал Канелоға келетін болсақ, соңғы жекпе-жегін көріп, оның осал тұстары бар деп айта алмаймын. Бәрі дайындыққа, психологияға және физикалық күйге байланысты. Кім жекпе-жекке қандай бапта келсе, сол жеңіске жетеді.
Бірақ чемпиондар мен ұлы спортшылар туралы пікір білдіруге менің деңгейім әлі жетіспейді. Өйткені бокста адамның қалай дайындалғанын, не ішіп-жегенін өз көзіңмен көрмейінше, ештеңе деп кесіп айта алмаймын. Олар өздерінің осал тұстарын ешкімге көрсетпейді, – деп жауап берді Бек.
Еске сала кетейік, 36 жастағы Канело – әлемдегі ең танымал боксшылардың бірі. Ол супер орта салмақта бокстан әлемнің абсолютті чемпионы болған, сондай-ақ басқа да салмақ дәрежелерінде жұдырықтасқан.
Оның кәсіпқой бокстағы есебінде 69 жекпе-жек бар, оның 64-інде жеңіске жеткен (39-ы мерзімінен бұрын). Соңғы жекпе-жегінде Кристиан Мбиллиге қарсы WBC тұжырымы бойынша чемпиондық белбеу үшін өткен бәсекеде төрешілердің бірауыздан шығарған шешімімен басым түсті. Бүкіл мансабында Канелоны нокаутқа, тіпті нокдаунға ешкім түсіре алмаған.
Таяу жылдары Канеломен жұдырықтасуы мүмкін боксшылардың бірі – қазақстандық Жәнібек Әлімханұлы. Ол мексикалық спортшыны бірнеше мәрте жекпе-жекке шақырған, енді оның салмақ дәрежесінде чемпиондық белбеуді иеленіп, онымен біріктіруші айқас өткізуге ниетті.
“Дайын бол, келе жатырмын“ - Әлімханұлы Канелоға үндеу жасады