“Бернли“ бапкері Ники Хайен Дастан Сәтбаевтың жағдайы туралы айтты

Фото: instagram.com/burnleyofficial/

Англиялық "Бернлидің" бас бапкері Ники Хайен қазақстандық шабуылшы Дастан Сәтбаевтың жарақаттан кейінгі жағдайы туралы айтып, оның команда үшін маңыздылығын атап өтті, - деп хабарлайды Tengri Sport.

Тәлімгердің айтуынша, құрамалар ойынына байланысты туындаған ұзақ үзіліс клубқа бірнеше футболшыны қатарға қосуға мүмкіндік береді.

Олардың қатарында 10 қазанда "Уотфордқа" қарсы өтетін Чемпионшиптің сырт алаңдағы матчіне қатысады деп күтіліп отырған Сәтбаев та бар.

"Джош Каллен жалпы топқа қосылуға жақын, Дастан да оралып жатыр, бұл бізге көбірек мүмкіндік береді. Дастанның сол екі матчте қаншалық маңызды болғанын бәрі біледі және оған қайта сенім арта алатынымыз біз үшін өте маңызды", – деп Хайеннің сөзін келтіреді Burnley Express.

Instagram-дағы бұл жарияланымды көру

Дастан Сәтпаевтың (@d.satpayev) жариялауы

Дастан Сәтбаевтың "Бернлидегі" мансабы

Еске салайық, Дастан Сәтбаев қазір жарақатынан айығып келеді, сондықтан Ұлттар лигасының ойындарына Қазақстан құрамасының соңғы тізіміне енбеді. 2 қыркүйекте өткен матчінде Сәтбаев 81 минут ойнап, алаңнан шығып бара жатқанда жамбасын ұстап кеткен болатын.

"Челсиден" жалға алу құқығымен келген сәттен бастап 18 жасар вингер төрт матчке қатысты (үшеуі чемпионатта, біреуі кубокта), бірақ әзірге нәтижелі ұпай жинай қойған жоқ.

Қазақстандық футболшы әлі гол соғып немесе нәтижелі пас беріп үлгермесе де, жанкүйерлер оның ойынына тәнті болуда, ал лига оны "Мидлсброға" қарсы кейінгі кездесудің үздік ойыншысы деп таныды.