Бокстан Азия чемпионатында тағы бір қазақстандық өзбекстандық спортшыдан алтынды жұлып алды

Қазақстандық боксшы Әлібек Алпамыс 80 келіге дейінгі салмақ дәрежесінде 17 жасқа дейінгілер арасындағы Азия чемпионатының финалында өзбекстандық Самандарбек Умаровты жеңді, деп хабарлайды Tengri Sport.

Қазақстандық 4:1 есебімен басым түсіп, ерлер құрамасына турнирдегі үшінші алтынды сыйлады. Айта кетейік, Алпамыс турнирдегі бұған дейінгі екі жекпе-жегін мерзімінен бұрын аяқтаған болатын.

Еске сала кетейік, бұған дейін 17 жасқа дейінгілер арасында бокстан өтіп жатқан Азия чемпионатында өзбекстандық спортшымен жекпе-жекте Эмир Мұхит чемпион атанған еді, ал Нұрасыл Ғалым финалда моңғолиялық боксшы Сулд Усухбаатарды ойсырата жеңді.

17 жасқа дейінгілер арасындағы Азия чемпионатындағы тағы екі Қазақстан - Өзбекстан текетіресі өзбек спортшыларының жеңісімен аяқталды.

Бокстан 15 және 17 жасқа дейінгі спортшылар арасындағы Азия чемпионаты Ташкентте (Өзбекстан) өтіп жатыр.

Бұған дейін 15 жасқа дейінгі Қазақстан құрамасы 24 медаль еншілесе, ал 17 жасқа дейінгі Қазақстан әйелдер құрамасы бес финалдың төртеуінде жеңіске жетті.