Футболдан Қазақстан құрамасының бұрынғы бапкері жұмысқа келмегені үшін қызметінен босатылды

Қазақстан құрамасының бұрынғы бапкері Магомед Адиев жаттықтырған беларусьтік "Витебск" футбол клубы маман жұмысқа келмегені үшін қызметінен қуылғанын жариялады, деп хабарлайды Tengri Sport.

Бапкер мен клуб арасындағы дау туралы осыдан бірнеше күн бұрын белгілі болған еді. Адиевтің заңгерлері "клубтың жаттықтырушыға қатысты заңсыз әрі қорлайтын әрекеттері салдарынан Адиев пен клуб арасындағы еңбек қатынастарын жалғастыру мүмкін болмай қалғаны" және келісімшарт бұзылғаны туралы ресми мәлімдеме жариялады.

Дегенмен, клуб бұл мәселеге қатысты басқа ұстанымда сияқты.

"МЛ Витебск" футбол клубының бұрынғы бас бапкері Магомед Адиев дәлелді себептерсіз жұмысқа келмегені үшін жұмыстан шығарылды", - деп хабарлады клубтың баспасөз қызметі.

Адиев Қазақстан футбол құрамасы тарихындағы ең табысты бапкер

Еске сала кетейік, Магомед Адиев Қазақстан құрамасында 2022 жылдың сәуірі мен 2024 жылдың мамыры аралығында қызмет етті. Оның жетекшілігімен команда алғаш рет Ұлттар лигасының С тобында жеңіске жетіп, Еуропа чемпионатына жолдама алуға екі қадам ғана қалған еді.

Ұлттық құрамадан кеткеннен кейін Адиев Грозныйдың "Ахматында" және Самараның "Крылья Советов" клубында жұмыс істеді. Бірақ "Ақтөбе" басшылығымен кездесуге Қазақстанға келгеннен кейін Ресей Премьер-лигасындағы жұмысынан айырылды.

Айта кетейік, футболдан Қазақстан құрамасы қазір бапкерсіз қалып отыр - Талгат Байсуфинов қызметінен өз еркімен кетті.