Жеңілмеген қазақстандық боксшы Канело турнирінде жекпе-жек өткізеді

Фото: instagram.com/nurmaganbet.bek.kazbekuli

Екінші орта салмақтағы жеңілмеген қазақстандық боксшы Бек Нұрмағанбет кештің басты жекпе-жегінде атақты Сауль Альварес жұдырықтасатын турнирде өнер көрсетеді, деп хабарлайды Tengri Sport.

Бек Нұрмағанбеттің келесі жекпе-жегі 31 қазанда Эр-Риядта (Сауд Арабиясы) өтетіні белгілі болды. Оның айқасы Riyadh Season аясындағы бокс кешінің бағдарламасына енді. Бұл кештің басты оқиғасы - мексикалық Сауль "Канело" Альварес пен француз Кристиан Мбилли арасындағы WBC чемпиондық белбеуі үшін өтетін титулдық кездесу.

Нұрмағанбеттің қарсыласы мексикалық Маркос Рамон Васкес Родригес болмақ. Турнир The Venue аренасында "Мексика әлемге қарсы" ұранымен өтеді.

КАНЕЛО МЕН МБИЛЛИ ЖЕКПЕ-ЖЕГІНІҢ АНДЕРКАРДЫНА ҮШ ТИТУЛДЫҚ КЕЗДЕСУ ҚОСЫЛДЫ 🔥 🥊 Хайме Мунгия - Никита Зонь 🥊 Рафаэль Эспиноза - Лоренцо Парра 🥊 Линдольфо Дельгадо - Артур Биярсланов #CaneloMbilli | 31 қазан | @RiyadhSeason | DAZN-да тікелей эфирде 🥊 https://t.co/h7OsCZjilZ
- Ring Magazine (@ringmagazine) October 8, 2026

Бек Нұрмағанбет деген кім?

Бек Нұрмағанбет - екінші орта салмақта өнер көрсететін 28 жастағы қазақстандық кәсіпқой боксшы. Кәсіпқой рингте ол 16 жекпе-жек өткізіп, барлығында жеңіске жеткен, оның 14-ін нокаутпен аяқтаған.

Боксшы IBF және WBC рейтингтерінің топ-тізіміне кіреді, Сауль Альварестің тұрақты спарринг-серіктесі, ал оның мүддесін Canelo Promotions (менеджері - Эдди Рейносо, Канелоның бапкері әрі менеджері) қорғайды.

Instagram-дағы бұл жарияланымды көру

Nurmaganbet Bek (@nurmaganbet.bek.kazbekuli) жарияланымы

Нұрмағанбет соңғы жекпе-жегін 2024 жылдың 25 шілдесінде Алматыда өткізді. Ол ресейлік боксшы Артыш Лопсанмен (14-3-2) кездесіп, техникалық нокаутпен мерзімінен бұрын жеңіске жетті. Осы жеңістен кейін қазақстандықтың рекорды 16-0 (14 КО) болды.