+7 (777) 001 44
99
"Астана Аренада" өткен Фарер аралдарымен драмаға толы матч 2:2 есебімен аяқталды. Бұл ретте екінші таймның ортасына қарай біздің команда екі доп айырмашылығымен ұтылып жатқан болатын. Құраманың қиын матчте таразы басын теңестіре алуы болашаққа үміт ұялатады.
Дегенмен, қалған екі кездесуде екі жеңіске жеткен күннің өзінде, дивизионда көтерілуге бұл жеткіліксіз болуы мүмкін.
Топтағы жағдай және Ұлттар лигасының регламенті
Қазір Қазақстан құрамасы төрт ойыннан кейін екі ұпаймен топта төртінші орында тұр. Көш басында Фарер аралдары (4 ұпай), Молдова (4 ұпай) және Словакия (10 ұпай). Словактар төртінші турда Молдованы ойсырата жеңіп (0:4), осылайша біздің команданың екінші орынға шығу мүмкіндігін сақтап қалды.
Словакияны бірінші орыннан ешкім ысыра алмайды, бұл да біздің командаға тиімді – себебі алда мықты, бірақ мотивациясы төмендеген қарсыласпен бетпе-бет кездесу күтеді.
Фото: Tengrinews.kz/Әлімжан Аманжол
Неге екінші орын алу маңызды?
Келесі маусымнан бастап Ұлттар лигасының форматы өзгереді. Төрт дивизионның орнына үшеу болады, ал үшінші дивизионға қазіргі С және D лигаларының, яғни ең төменгі деңгейдегі командалар жиналады.
Егер Қазақстан В лигасына жолдама алса, онда деңгейі жоғары қарсыластармен ойнауға мүмкіндік алады. Ең бастысы, Ұлттар лигасы дивизиондарындағы орны Еуропа чемпионатының іріктеу кезеңіне әсер етеді. Дивизиондар құрамына қарай екі іріктеу лигасы құрылады: бірінде А және В дивизиондарының командалары, ал екіншісінде тек С дивизионының командалары жиналады.
Жаңа жүйе туралы толығырақ мына материалдан оқыңыз.
В лигасына тікелей жолдаманы тек бірінші орын береді, бірақ екінші сатыға ие болса, команда В дивизионының ең әлсіз ұжымдарымен түйісу матчтерінде ойнауға кепілдік алады. Қазір бұл қатарда Грузия, Израиль, Солтүстік Македония және Румыния бар – олар мықты, бірақ деңгейі жағынан жеңуге болатын командалар.
Лигалар арасында ауысу тұрғысынан үшінші орынның маңызы жоқ – қос команда да келесі маусымды С лигасында өткізеді.
Қазақстан құрамасы екінші орынға ие болу үшін не істеу керек?
Екі жеңіс және Фарер аралдарының жеңілісі
Ең тиімді нұсқа – соңғы екі матчте алты ұпай жинау. Бірінші қадам – 13 қарашада сырт алаңда Молдовамен, екіншісі – 16 қарашада өз алаңында Словакиямен өтеді. Словактар ол уақытқа дейін бірінші орынды иеленіп қоятындықтан, Астанаға негізгі құрамсыз келуі де мүмкін.
Ондай жағдайда біздің команда қоржынында 8 ұпай болады және Молдова мен Фарер аралдары өзара қалай ойнаса да, біз Молдовадан озып кетеміз.
Алайда, егер Фарер аралдары да осынша ұпай жинаса (мысалы, Словакиямен тең түсіп, Молдованы жеңсе), онда екінші орын тағдырын голдар айырмашылығы шешеді – әзірге біз бұл көрсеткіш бойынша арттамыз (-2 мен 0).
Фарер аралдарының алда Словакиямен сырт алаңдағы матчі бар, бұл жерде "Қайраттың" бұрынғы бапкері Владимир Вайсс жеңіске жетіп, Қазақстанға көмектесе алады.
Оқиғалар сәтті өрбіген жағдайда топтағы көрсеткіш мынадай болуы мүмкін:
- Словакия – 13 ұпай;
- Қазақстан – 8 ұпай;
- Молдова – 7 ұпай/Фарер аралдары – 7 ұпай/Фарер аралдары – 5 ұпай;
- Фарер аралдары – 4 ұпай/Молдова – 4 ұпай/Молдова – 5 ұпай.
Бір жеңіс пен бір тең ойын да топтан шығаруы мүмкін
Белгілі бір жағдайда Қазақстан құрамасына екі матчте 4 ұпай да жеткілікті болады. Ең бастысы – сырт алаңда Молдованы жеңу, сонда словактармен өз алаңындағы кездесуде тең ойынның өзі жарап қалуы мүмкін.
Мұнда да бәрі Фарер аралдары мен Словакия арасындағы матчке байланысты болады. Егер олар ұтылып, кейін Молдовамен тең ойнаса, топтағы жағдай мынадай болады:
- Словакия – 14 ұпай;
- Қазақстан – 6 ұпай;
- Фарер аралдары – 5 ұпай;
- Молдова – 5 ұпай.
Ал соңғы турдағы Фарер аралдары мен Молдова матчінде командалардың бірі жеңіске жетсе, біздің құрамаға Словакияны жеңу міндетті болады.
Қалай болғанда да, қазіргі ең басты мақсат – Молдовада сырт алаңда жеңіске жету. Бірақ бұны қорғаныс көшбасшысынсыз іске асыруға тура келеді: Сергей Малый Фарер аралдарымен өткен матчтің аяғында қызыл қағаз алды.
Фото: Tengrinews.kz/Әлімжан Аманжол
Бұл ретте шабуылдағы көшбасшылардың қатарға қосылуынан үміт бар: естеріңізге сала кетейік, Ұлттар лигасының алғашқы төрт матчінде Ислам Чесноков, Дастан Сәтпаев және команда тарихындағы үздік сұрмерген Бахтиер Зайнутдинов құрамаға көмектесе алмаған болатын.
