+7 (777) 001 44
99
70 келіге дейінгі салмақ дәрежесінде өнер көрсететін қазақстандық боксшы Абылайхан Жүсіпов Әлем кубогі кезеңінің жартылай финалына шықты, - деп хабарлайды Tengri Sport.
Ширек финалда қазақстандық әлем чемпионы өзбекстандық Шавкатжон Болтаевпен жұдырықтасты.
Жекпе-жек барысы
Бірінші раундтың басында Болтаев арақашықтықты жақындатып, жекелеген соққылар бағыттады. Жекпе-жектің ортасына қарай Жүсіпов өз қарқынын тауып, қарсы шабуылдармен жауап бере бастады, бұл оған раундта жеңіс сыйлады.
Екінші раунд өзбекстандық боксшы Жүсіповті арқанға тақап, бірнеше соққы дарыта алды, алайда қазақстандық боксшы тез арада тығырықтан шығып, өзі де жұп соққылар жасады. Раунд соңына қарай Жүсіпов сол жақ кросс соққысын дәлдеп, бірнеше ауыр соққы жұмсады. Төрешілер бұл жолы да қазақстандықты мықты деп таныды.
Шешуші кезең де осы мәнерде өтті: қазақстандық боксшы еңкейіп соққылардан жалтарып, өзі қарсы шабуылдармен қарсыласын дәл көздеді.
Жекпе-жек қорытындысы бойынша Абылайхан Жүсіпов төрешілердің біріккен шешімімен жеңіске жетті.
Осылайша, ол жартылай финалға жолдама алып, турнирдің кем дегенде қола медалін иеленді, өйткені жарыс регламенті бойынша үшінші орын үшін талас өткізілмейді.
Еске салайық, 1/8 финалда Абылайхан Жүсіповтің қарсыласы бразилиялық боксшы Кайан Рейес болған еді. Үш раундтың қорытындысы бойынша төрешілер 4:1 есебімен жеңісті Абылайхан Жүсіповке берді.
Instagram-дағы бұл жарияланымды көру
Абылайхан Жүсіпов - бокстан әлем чемпионы
Еске салайық, Абылайхан Жүсіпов 2025 жылғы желтоқсанда Дубайда Халықаралық бокс қауымдастығы (IBA) ұйымдастырған әлем чемпионатында мансабында алғаш рет титул жеңіп алған болатын. 71 келіге дейінгі салмақтың финалында ол ресейлік Сергей Колденковты 4:1 есебімен ұтты.
Instagram-дағы бұл жарияланымды көру
Айта кетейік, World Boxing ұйымдастырған бокстан Әлем кубогының екінші кезеңі 15-21 маусым аралығында Гуйян қаласында (Қытай) өтеді. Жарысқа қатысатын Қазақстан құрамасы сапында 9 ер және 8 әйел боксшы бар.
