+7 (777) 001 44
99
Бакудегі ғажайып: қазақстандық футболшы Чемпиондар лигасының ортақ кезеңіне қалай шықты
Әзербайжандық ұжым 94-минутқа дейін есепте артта келе жатып, жеңісті жұлып алды.
Ойынның 3-минутында-ақ Покатиловтың командасы "Хапоэльден" гол жіберіп алды, бірақ ол офсайд себебінен есептелмеді. Кейінірек қонақтар есепте алға шығып, екі кездесудің қорытындысы бойынша есеп 3:1-ге жетті.
"Сабах" есепті теңестіргенімен, Израиль клубы 61-минутта тағы да алға шықты. 74-минутқа қарай таразы басы қайта теңелгенімен, бұл есеп "Хапоэльді" келесі кезеңге өткізіп тұрған еді.
Айта кетейік, жіберілген екі голда да қазақстандық қақпашының қателігі бар - Покатилов алдымен айып алаңынан шығуда сәтсіз ойнаса, кейін допты қарсыластың аяғына сала берді.
94-минутта бұрыштамадан асырылған доптан кейін әзербайжандықтар бұл матчте алғаш рет алға шығып, ойынды овертаймға ұластырды. Қосымша уақытта олар екі қызыл қағаз алған қарсыласынан бір бас жоғары болды.
Қорытынды есеп 5:2, екі кездесудің нәтижесі - 6:4. Қазақстан құрамасының қақпашысы өз мансабында алғаш рет Чемпиондар лигасында бақ сынайды.
"Селтиктің" кезекті масқара жеңілісі және "Буде-Глимттің" Чемпиондар лигасына қайта оралуы
"Кайраттың" өткен жылғы қарсыласы - шотландиялық "Селтик" Чемпиондар лигасының ортақ кезеңіне шығу жолында алғашқы матчтен кейін үлкен басымдыққа ие болған еді. Глазголық ұжым өз алаңында австриялық "ЛАСК-ты" 3:0 есебімен тас-талқан еткен.
Австриядағы ойын "Селтиктің" голымен басталғанда, шотландық жанкүйерлер жеңісті тойлай бастады - алаң иелеріне 70 минут ішінде 4 гол соғу керек болатын.
Бірінші таймның соңына қарай "ЛАСК" тек бір гол соға алды, бірақ екінші таймды қарсыласынан әлдеқайда сенімді бастады. 58-минутта есеп 3:1-ге жетіп, жалпы есепті теңестіруге бір ғана гол қалды.
Флориан Флеккер 91-минутта қапталдан асырылған тамаша пасты голға айналдырып, есепті теңестірді. Овертаймда "Селтикті" талқандау одан ары жалғасты.
Матч 5:1 есебімен аяқталып, екі ойынның қорытындысы бойынша 5:4 есебімен "ЛАСК" жеңіске жетті.
Еске сала кетейік, өткен жылы "Селтик" алматылық "Қайратпен" текетіресте фаворит саналғанымен, бірде-бір гол соға алмай, Алматыдағы пенальти сериясында есе жіберген болатын.
Чемпиондар лигасының ортақ кезеңіне өткен тағы бір қатысушы - норвегиялық "Буде-Глимт". Олар алғашқы ойында қонақта 3:1 есебімен сенімді жеңіске жетсе, өз алаңындағы қарымта кездесуде жауапсыз үш доп соқты.
Айта кетейік, Чемпиондар лигасының іріктеу кезеңіндегі Қазақстанның жалғыз өкілі - алматылық "Қайрат" турнирдің ортақ кезеңіне шығуға мүмкіндік беретін плей-офф сатысына дейін жете алмады. Қазақстандықтарды жарыстан шығарған болгариялық "Левски" бүгін өз алаңындағы нөлдік тең ойыннан кейін грекиялық "АЕК-пен" жолдама үшін таласады.
“Барселона” ойыншысы “Алтын доптың” жаңа фавориті атанды
